Сыр өңірі жыл сайын­ жаңарып, жаңғырып, экономикасын арттыру үстінде. Кешегі Жаңақорған ауданында өткен малшылар слеті көп ұзамай Арал ауданындағы балықшылар тойына ұласса, сенбі күні Шиелі ауданының балығын Ресей Федерациясына экспорттау басталды. Аудан әкімі Әшім Оразбекұлының бас­тамасымен құрылған «СПК Сыр балығы» балықшылар кооперативі 4,5 тонна балықты шекарадан асыруда.
«Өзен жағалағанның өзегі талмайды» – деген осы бір қағиданы балықшылар сан мәрте дәлелдеп келеді. Тіпті, сонау ашаршылық кезеңінде талай адамды ажал тырнағынан арашалаған да осы балықшылар қауымы екені тарихтан мәлім. Жалпы, Шиелі ауданында тауарлы балық өндіруге қолайлы иесі бар 20 көл, иесіз 19, нақтырақ 39 көл тіркеуде бар. Ал, Нәнсай-Ханқожа жүйесі бойынша балық шаруашылығы субьектілеріне 2018 жылға бекітілген табиғат пайдаланушылардың балық аулау лимиті 56 тонна.
Теңізден маржан сүзген балықшылардың өнімін біріктірген «СПК Сыр балығы» балықшылар кооперативінің төрағасы Абуталип Омаров: «Бүгінгі таңда балық аулау жұмыстары жүргізіліп, оларды сақтайтын арнайы тоңазытқыштар орнатылды. Ауылдардағы балықшыларды ау, қайық сынды қажетті құралдармен жабдықтап, экспорт көлемін арттыруды қолға алудамыз» – деді. Ал, Ресей Федерациясынан келген Денис Яковлев балықты қайта өңдеп шығару ісімен айналысады. Сыр өңірінің тумасы туған жерде өз ісін өркендетуді ойлап, Шиелі ауданынан балық зауытын ашуды көздеп отыр. «Барлық көлдерді аралап шықтық. Балық көлемі жеткілікті болғандықтан зауыт ашуға мүмкіндік барына көз жеткіздік. Алдағы уақытта бірнеше адамды жұмыспен қамтитын, балықшылардың өнімін өткізер арнайы орын болады» – дейді ресейлік азамат.

Иә, зауыт ашылса су үстінде күн кешкен балықшылар қауымының жағдайы да оңалмақ. Аудандық ауылшаруашылық бөлімінің басшысы Мұрат Әшірбеков: «Бүгінгі таңда «СПК Сыр балығы» балықшылар кооперативін құрып, оған 31 адам мүшелік етуде. Ресей мемлекетінің азаматтарымен келіссөз жүргізу арқылы ай сайын 20-30 тонна балықты экспортқа шығару жоспарда бар. Сонымен қатар, балықты өңдеу, қабылдау зауытын салу, оған қажетті жер мәселесі жөніндегі тиісті заңнамалық жұмыстарды үйлестірудеміз» – деді. Сыр өңірін ақ маржанымен әлемге әйгілеген Шиелі ауданы су маржанын да экспортқа шығарып, ел экономикасын жандандырмақ. Дала төсінде ризығын егіннен тапқан диқаншылар қауымымен қатар енді балықшылар кооперативі де қызу іске кірісті.

Гүлнәр ДҮЙСЕБАЙ,
суреттер Бақытжан Бәйімбеттікі.