Ауылдық өңірлерде жұмыс істегісі келетін жастар үшін жаңа мүмкіндік пайда болды. «Отбасы банк» «Дипломмен – ауылға» атты жаңа бағдарламаны іске қосқан. Бұл бастама ауылда еңбек етіп, сонда тұрақты өмір сүруге ниетті жас мамандарға нақты қолдау көрсетуді көздейді, деп жазады Egemen.kz.

Бағдарлама аясында қатысушыларға екі негізгі мүмкіндік қарастырылған. Біріншісі – 100 айлық есептік көрсеткіш (АЕК) көлемінде бір реттік көтерме жәрдемақы. Бұл ауылға барып, жаңа ортаға бейімделіп жатқан жас мамандар үшін елеулі көмек болмақ.

Екінші және ең маңыздысы – тұрғын үйге 1 пайыздық жеңілдетілген несие. Бұрын мұндай шарт қарастырылмаған еді. Енді ауылдық жерде үй салу немесе сатып алу әлдеқайда қолжетімді болмақ. Несие сомасы елді мекенге байланысты 2 500 АЕК-ке дейін, ал қайтару мерзімі 15 жылға дейін белгіленеді. Бұл уақыт аралығында маман тұрақты жұмыс істеп, өз өмірін қалыптастыра алады.

Бағдарламаға білім беру, денсаулық сақтау, әлеуметтік қорғау, мәдениет, спорт, агроөнеркәсіп салаларында жұмыс істейтін мамандар қатыса алады. Сондай-ақ ауылдық округ әкімдіктерінің аппарат қызметкерлері де өтінім бере алады, бірақ әкімдер мен олардың орынбасарлары бұл тізімге енбейді.

Қатысушыларға қойылатын талаптар да нақты көрсетілген: үміткердің техникалық, кәсіптік немесе жоғары білімі болуы шарт және ол алған мамандығы бойынша кемінде үш жыл ауылда жұмыс істеуге міндетті. Бұған қоса, бұрынғы несиелері бойынша мерзімі өткен қарыз болмауы керек.

Өтінім беру процесі барынша жеңілдетілген. Алдымен жас маман ауылдағы бос жұмыс орнын табуы немесе жергілікті әкімдікке жүгінуі қажет. Кейін Baspana Market онлайн платформасында тіркеліп, электронды өтінім тапсырады. Барлық құжаттарға ЭЦҚ арқылы қол қоюға мүмкіндік бар.

Жоба қоғамда оң пікір тудырды. Көпшілік «жас мамандарға осындай мүмкіндік берілуі – мемлекет тарапынан нақты қамқорлықтың белгісі» деп бағалап отыр. Ал ауыл тұрғындары жастардың келуі ауыл өміріне жаңа серпін беретінін айтады. Өз кезегінде жас мамандар «1 пайыздық несие – бұрын болмаған ерекше мүмкіндік» деп қуаныштарын жасырмай отыр.