Оқу жылы қарсаңында дәстүрлі облыстық тамыз конференциясы өтті. Онда білім саласындағы өзекті мәселелер мен жаңа оқу жылына қойылатын негізгі міндеттер кеңінен талқыланып, маңызды ұсыныстар ортаға салынды.
«Білім келешегі: адал азамат, кәсіби маман» тақырыбындағы конференция барысында өңір ұстаздарының еңбегі еленіп, түрлі марапаттар берілді.

Соның ішінде облыс әкімінің «Орта білім беретін үздік ұйым» грантына Шиелі ауданындағы №47 мектеп-лицейі лайық деп танылып, 34 миллион теңгенің сертификаты табысталды.

Заманауи талаптарға сай жабдықталған бұл білім ұясы – еліміз бойынша үздік инновациялық мектептердің қатарында. Мұнда жоғары санатты, тәжірибелі ұстаздар еңбек етсе, олардың жетекшілігімен дарынды оқушылар түрлі деңгейдегі білім сайыстарында оза шауып келеді.

Мектеп тек біліммен шектелмей, өнер мен спортты да қатар ұштастыра отырып, жан-жақты тұлға тәрбиелеуге бағытталған. Осы еңбектің нәтижесі ретінде үздік деп танылған білім ұйымына табыс тілейміз!