Бүгін Бангкокта нысана көздеуден Азия Кубогінің соңғы жарыс күні өтті, деп жазады
Egemen.kz. Спортты дамыту дирекциясының мәліметінше, дүбірлі додада сәтті өнер көрсеткен мергендеріміз жалпы есепте көш бастады. Қазақстан қоржынына жиыны 12 алтын, 9 күміс, 4 қола түсті. Бүгінгі жарыс күнінде ел спортшыларының сапында Александра Ле, Арина Алтухова, Елизавета Безрукова 50 метрден винтовкадан атудан (командалық) алтын жүлде олжалады. Жекелей сында Париж олимпиадасының қола жүлдегері Александра Ле 50 метрден винтовкадан атуда үздік екенін дәлелдеп, алтыннан алқа тақты. Дәл осы сында отандасымыз Елизавета Безрукова күміспен күптелді. Никита Чирюкин 25 метрден тапаншамен атудан бірінші тұғырдан көрінді. Жалпы командалық есепте Қазақстаннан кейін екінші сатыға Оңтүстік Корея жайғасса, үздік үштікті Сингапур түйіндеді.
