Түркияда қазақ-түрік сөздігі мен «Түркі тілдеріндегі етістіктер» атты еңбектің таныстырылымы өтті. Халықаралық Түрксой ұйымының штаб пәтерінде өткен мәдени мәжілісте туыстас тілдердің өзара байланысы, бүгіні мен болашағы сөз етілді, деп хабарлайды Egemen.kz. Іс-шараға Түркия және Қазақстан университетінің тіл ғалымдары мен мәдениет қайраткерлері қатысты. Олар қазақ және түрік тілдерінің арасындағы лексикалық, грамматикалық ұқсастықтар мен айырмашылықтарды қарастырып, түркі тілдеріндегі етістіктердің тарихы мен қазіргі жағдайы жөнінде баяндама жасады. Сонымен қатар түркі дүниесіне ортақ тілдік платформа жасақталып, цифрландыру дәуіріндегі технологиялық терминдерді шығару жоспары талқыға салынды. Кітап авторы доцент Кенен Коч сөздіктердің ғылыми жұмыс қана емес, бауырлас халықтар арасында тіл арқылы байланыс орнатудың жаңа қадамы екенін айтады.