Жаңа жыл – балалар үшін ұмытылмас оқиға. Бұл мерекені өткізу Шиеліде дәстүрге айналған. Шаттық мейрам кішкентай тұрғындарды қуантып қана қоймай, оларға ұмытылмас сәт сыйлайды. Себебі балалардың бақытты жүздерін, шынайы күлкілерін көруден артық ештеңе жоқ. Осы тұста бейсенбі күні денешынықтыру-сауықтыру кешенінде аудан әкімі Айтбай Жандарбековтың балаларға арналған Жаңа жылдық шыршасы өтті. Оған аудан мектептерінен жиналған оқушылар қатысып, аудан әкімімен бірге жаңа жылдық шыршаның шамын жақты. Шыршаға республикалық, облыстық олимпиадалардың, байқаулардың жеңімпаздары, аз қамтылған, және көп балалы отбасыларынан шыққан 200-ден астам мектеп оқушылары мен бүлдіршіндер қатысты.
– Мемлекет басшысы Қасым-Жомарт Тоқаев «Болашақтың кілті, елдің ертеңі – білімді жастар. Мемлекеттің дамуы, өсіп-өркендеуі тікелей жастарға байланысты» деп атап өтті. Сол себептен сіздер ұлтын сүйетін, отанын қорғайтын, ата-ананы сыйлайтын, ұстаздарын қадірлейтін, достықты бағалайтын, білімді азаматқа лайық болуларыңыз керек. Балалардың бақытты өмір сүруі үшін мемлекет тарапынан үнемі қамқорлық көрсетіліп, барлық жағдай жасалып келеді. Баршаңызға жаңа жылан жылында бақыт, денсаулық, үздік оқу тілеймін. Жаңа шыңдардан көрініп, ауданның даңқын көтере беріңіздер, – деді А.Жандарбеков.

Сондай-ақ шара барысында аудан әкімі оқушыларға мерекелік сыйлықтар табыс етті. Әрі қарай жаңа жылдық кеште балалар өз өнерлерін ортаға салды. «Ұлу жылымен» қош айтысып, «Жылан жылын» қарсы алды. Мұнан соң жаңа жылдың кейіпкерлері аяз ата мен ақшақарды қарсы алған құлыншақтар ән-жырдан шашу шашып, би билеп, өнерлерін ортаға салып, сыйлықтарға ие болды. Жасыл шырша жанына жиналған ертегі кейіпкерлері ғажайыпқа толы қойылымдар көрсетті.