Аудан әкімі алдымен білім саласының ардагерлері Ұлтай Әуелбекқызы мен Дәмегүл Әлібайқызын және Шиелі ауданының "Құрметті азаматы" Бибіжан Жәукебаеваның шаңырағына ат басын бұрып, білім саласының дамуы мен өркендеуіне өз үлесін қосқан аналардың еңбегі ешқашан ұмыт болмайтындығын жеткізді. Өз кезегінде кейуаналар ардагерлерді ардақтап, құрмет көрсеткен қос азаматқа ризашылығын білдірді.

Мұнан соң, аудан басшысы тыл ардагерлері 97 жастағы Ауаш Еспанова мен 94 жастағы тыл ардагері Күлсін Төлегенованы төл мерекемен құттықтады.

Аудан әкімі өз сөзінде «Қарттарымыз қазынамыз. Біз әрдайым сіздердің еткен еңбектеріңіз бен ел үшін жасаған қызметтеріңізді жадымыздан шығармаймыз. Сіздердің өмір жолдарыңызды әрдайым бүгінгі буынға өнеге етіп келеміз. Бүгінгі өздеріңіз арқылы барша ауданның ақжаулықты аналары мен қыз-келіншектерді мерекемен құттықтаудамыз»,- деді.

Арнайы құттықтай келген азаматтарға ризашылығын білдірген кейуаналар елдің амандығын тілеп, ақ батасын берді.