Бірі жан бағып, бірі қарманып, енді бірі жалданып жүрген базар іші. Қаһарлы қаңтардың ызғарына қарамастан арлы-берлі жүрген адамның қарасы қалың. Дүниенің дүбірге толы екенін білу үшін осы жерде сәл ғана кідіріс қылсаңыз жеткілікті. Дуылдап тұрған базар ішінде әлеумет әмиянын тексеріп, қалтасын қақпайтын жерлерден сауда жасағысы келетінін аңғару қиын емес. Өйткені базардағы азық-түлік бағасы аракідік апшыны қуырады.
«Арыстан алыстан ақырса, аттың аяғы шалынады» деген бар емес пе? Зейнетақы өсіп, жалақы көбейсе болды, нарықтағы құн құбылып шыға келеді. Сонымен қатар базар бағасы маусымдық кезеңге байланысты да өзгеріп отырады. Ал кейбір тауарлардың бағасы қанша болатыны саудагердің өз еркінде. Кей саудагер келушінің көңілінен шығу үшін 5-10 теңге түсірсе, бәзбіреулер жаңалықты қалт жібермей, өнімін лезде қымбаттатып жібереді.

Иә, әне-міне дегенше қоян жылының екі аптасын да артқа тастадық. Қарасақ, келген жыл жаман басталған жоқ. Сүйіншілейтін, көңілге қонымды жақсы жаңалықтар көп-ақ. Жаңалық демекші, биылдан бастап білім беру саласы қызметкерлерінің еңбек ақысы 25 процентке өсіп, зейнетақы мен жәрдемақы мөлшері де көбейді. Дәстүрге сай қыс мезгілінде де базар бағасы бақылаудан шыққан жоқ. Бірақ бұл жолы бәрі бұрынғыдан өзгерек. Базар бағасын бағамдап көрсек, аспандап тұрған бағалар жоқтың қасы. Яғни, енді қымбатшылық қараша халықты бүйірден қыспайтын сыңайлы.

Сала мамандарының мәліметіне сүйенсек, бүгінде әлеуметтік маңызы бар азық-түлік өнімдерінің 19 түрі бақылауда. Соның ішінде күріштің келісі орташа есеппен – 350-400 теңгеден, бірінші сортты ұнның 1 келісі – 210-230 теңге болса, нан – 95-100 теңге, картоп – 185-230, пияз – 185-230. Ал қарақұмықтың бағасы – 550-600, құмшекердің келісі – 450, еттің келісі – 2000, тауық етінің келісі – 100-1200 теңгенің арасында сатылымға түсуде.