Биылғы көктемде Сыр елінен 750 жасты Қарулы күштердің, басқа да әскерлер мен әскери құралымдардың қатарына жіберу жоспарланып отыр.

 – Қаңтар-наурыз айларында шақыру контингенті тиянақты зерделенді. Шақырылушылармен, олардың ата-аналарымен жеке-жеке әңгімелер жүргізілді. Бұл шараның жастарды әскери бөлімдер бойынша іріктеу мен бөлу кезінде маңызы зор. Шақырылушылардың алған мамандықтары, денсаулық жағдайы, дене және моральдық-психологиялық дайындығы ескеріледі, – дейді Қызылорда облысының ҚІЖД бастығының орынбасары – жасақтау басқармасының бастығы подполковник Дмитрий Жерегя.

– Осы уақытта аудандық және облыстық медициналық тексерулерден жақсы өттім. Психологиялық тест жауаптары да жақсы нәтижеде. Балалық шағымда әскери адам болу арманым болатын. Мерзімді әскери қызметімді аяқтаған соң әскери бөлімде келісімшарт бойынша қызмет етемін деген ойым бар. Бауырларымды, достарымды, інілерімді Отан алдындағы әскери борышын өтеуге шақырамын, – дейді әскер қатарына шақырылушы Алтынбек Төлебай.

Қызылорда облысында соңғы жылдары мерзімді әскери қызмет өткеруге ниет білдірушілер саны көбейген. Әскерден соң жоғары білімі бар, қандайда бір мамандықты игерген азаматтар келісімшарт бойынша әскери қызметке орналаса алады.

Көктемгі әскерге шақыру науқаны маусым айының соңына дейін жалғасады.

                                                          Қызылорда гарнизоны баспасөз қызметінің бастығы
лейтенант Мұхит Қонаров