Үздік студент – 2020
17 қараша – Халықаралық студенттер күніне орай Қызылорда облыстық жастар ресурстық орталығының ұйымдастыруымен студенттер арасында шығармашылық қырынан танылып, қоғамдық жұмыстарға белсене араласып жүрген Шиелі индустриалды-аграрлық колледжінің студенті Дамир Баянбаев облыстың «Үздік студенті» атанды.№49 орта мектептің түлегі Дамир Баянбаев қазір Шиелі индустриалды-аграрлық колледжінің 3 курс студенті. Мамандығы – Өндірістегі электрлік-механикалық жабдықтар, біліктілігі – техник-механик.
Жас болса да бас болып жүрген Дамир ШИАК колледжінде «Ашық жүрек» еріктілер тобын құрып, жастар жылында түрлі іс-шараларды ұйымдастырып, былтыр аудан әкімінің «Серпін» жастар сыйлығының иегері атанған. Дарынды студент бұған дейін де түрлі аудандық, облыстық жарыстарда жетістіктерге жетіп, жүлделі болған. Жүлделерінің ішіндегі төресі Республикалық «Bilim-orkeniety» ұлттық инновациялық ғылыми-зерттеу орталығының ұйымдастыруымен өткен Қазақстанның үздік 100 студентті анықтау байқауында «Жылдың үздік студенті» кітабына енген, «Жылдың үздік студенті – 2020» диплом марапаты мен төсбелгісі. Алайда карантиндік жағдайға байланысты құттықтау сәт онлайн режимінде өтіп, пошта қызметі арқылы табысталды.
Ақбота МҰРАТҚЫЗЫ
