Шиеліліктерді лайықты жұмыспен қамтамасыз ету, жалақыларын уақытында төлеу, жұмыс орнында еңбек қауіпсіздігін сақтау осы бағытта жұма күні аудан әкімдігінің мәжіліс залында үш жақты келісімге қол қойылды.

Меморандумның негізгі мақсаты – оған қол қойған жұмыс берушілер тарапынан негізсіз жұмыстан босатуларға жол бермеу, жұмыскерлердің еңбек құқықтары мен кепілдіктерін сақтау. Сондай-ақ, жұмыс берушіні билік тарапынан қолдай отырып, өндірістің қалыпты жұмыс жасауын қамтамасыз ету мәселелері жөніндегі үш жақты келісім.
Осыған ұқсас келісім-шарт бұдан үш жыл бұрын, яғни, 2016-2018 жылдарға есептеліп жасалған. 2019 жыл басталғалы келісім күшін жойып, жаңа келісімге қол қойылды. Ескі құжаттың бітірген шаруасы көп. Жаңа келісімнің бұрынғысынан артықшылығы – «Қазақстандықтардың әл-ауқатының өсуі: Табыс пен тұрмыс сапасын арттыру» атты Жолдауда атап айтқандай, 2019 жылдың 1 қаңтарынан бастап жалақының ең төменгі мөлшері 42 500 теңгені сақтауды енгізген. Сонымен қатар, өндірістік автоматтандыру, жаңару, жаңарту бағыты бойынша жұмыстар атқара отырып, жұмысшыларды қысқартпай жұмыс орындарын сақтау келісімде бас­ты негіз болып отыр.
Үшжақты келісім аясында оған қол қоюшы тараптар, жұмыскерлердің әл-ауқатының деңгейі мен өмір сапасын жақсарту бойынша және еңбек саласындағы заңдылықтарды сақтап, өндірістің қалыпты жұмыс жасауы үшін барлық мүмкіндіктерді жасауға міндеттеме алды. Аталған шараға 7 орта кәсіпорын мен 62 жеке балабақша қатысты.

Жұлдызай Ноғайбайқызы.