Елена Рыбакина әлемнің сегізінші ракеткасы атанды

Қазақстанның ең үздік теннисшісі Елена Рыбакина Индиан-Уэллстегі (АҚШ) турнирдің финалына шыққаннан кейін WTA рейтингінде рекордтық сатыға көтерілді.

Live-рейтинг деректері бойынша Рыбакина 3370 ұпай жинап, әлемдік рейтинг кестесінің сегізінші сатысына көтерілді. Бұл ретте Елена финалда жеңіске жетсе, одан да жоғары көтерілуі мүмкін.
Еске салайық, BNP Paribas Open-2023 турнирінің жартылай финалдық кездесуінде Елена Рыбакина әлемнің бірінші ракеткасы польшалық Ига  Швентектен екі сетте (6:2, 6:2) басым түсті. Финалда ол әлемдік рейтингте екінші орында тұрған Беларусь спортшысы Арина Соболенкомен кездеседі.