Кедергісіз қоғам қалыптастыру
Қараша айының 22 жұлдызында аудан әкімдігінде мүгедектерге «Кедергісіз орта қалыптастыру» мақсатында комиссия отырысы өткізілді.Күн тәртібіндегі бірінші мәселе бойынша мінберге шыққан аудандық жұмыспен қамту, әлеуметтік бағдарламалар және азаматтық хал актілерін тіркеу бөлім басшысының орынбасары Жандос Абенов аудан көлемінде мүгедектерге кедергісіз орта қалыптастыру жөнінде 2017 жылы атқарылған жұмыстар жайлы хабарлама жасады. Аудан бойынша 234 әлеуметтік құрылым объектілеріне түгендеу жұмыстары жүргізіліп, оның ішінде 99 ғимарат бейімделуге жатады деп танылған. Бүгінгі күнге дейін 92 ғимаратқа бейімдеу жұмыстары жасалған.
«Осы жұмыстардың орындалуын ұйымдастыру мақсатында үйлестіру комиссия отырысында 2012 жылдан бастап меншік нысанына қарамастан кезең-кезеңімен бүгінгі күнге дейін орындалатын жұмыс көлемдері белгіленіп, тиісті лауазым иелеріне нақты тапсырмалар беріліп келеді. Үйлестіру комиссиясының 2017 жылдың 2 маусымдағы отырысында атқарылған жұмыстарды қорытындылап стандарт талаптарына толық сәйкестендіру мақсатында тағы да қосымша тапсырмалар беріліп, бақылауға қойылған болатын. Өкінішке орай орындалған жұмыстарда әлі де кемшіліктер бар», – деді Ж.Абенов.
2016 жылы стандарт талаптарына толық сәйкестендіріп бейімдеуге тиісті жұмыстарды толық аяқталуға тиіс мекемелердің барлығын аралап, зерттеу жүргізілген. Мемлекеттік мекемелер мен кәсіпкерлік субъектілеріндегі стандартқа сәйкес және сәйкес емес пандустар слайд арқылы көрсетілді. Сонымен қатар, стандартқа сәйкес пандустар мен бастырмаларды қажет ететін ғимараттарды атады.
Бұдан бөлек, еңбек, әлеуметтік қорғау және көші-қон комитетінің Қызылорда облысы бойынша департаментінің халықты әлеуметтік қорғау саласындағы бақылау бөлімінің басшысы Болат Накипов баяндама жасады. Ол алдағы уақытта барлық мемлекеттік және өзге де ұйымдарда, оның ішінде денсаулық сақтау, мәдениет, байланыс, көлік, қызмет көрсету саласындағы ұйымдарда заңмен белгіленген тәртіпте мүмкіндігі шектеулі азаматтардың құқықтарын іске асыруға қолжетімділігін қамтамасыз етуді және оның жүзеге асырылуын бақылау жұмыстары жөнінде ақпарат берді.
