Өңірде 80 мыңнан астам адам немесе тұрғындардың 19%-ы жеке науқастың кабинетін ашып, Damumed мобильді қосымшасына тіркелген. Бұл туралы облыс әкімдігінде өткен аппарат кеңесінде денсаулық сақтау басқармасының басшысы Ораз Мұқашев хабарлады.

– Бүгінгі күні барлық емханаларда амбулаторлық карталары бар ескі тіркеу орындары қайта ұйымдастырылған, – деді Ораз Мұқашев. – Оның орнына ақпараттық анықтама қызметі жұмыс істейді. Кейбір аудандарда қосымшаны пайдалану бойынша көрсеткіш төмен. Осыған байланысты аудандардың әкімдері қосымшаға қосылу бойынша жұмысты күшейткен дұрыс.

Айта кету керек, DamuMed – кешенді медициналық ақпараттық жүйенің бір бөлігі. Мобильді қосымшасының көмегімен үйде дәрігерге қоңырау шалуға немесе жазылуға болады. Сондай-ақ жазылған рецептілерді және зертханалық талдау нәтижелерін қарап, аурухана парағын жүктеп алу қарастырылған. «Дабыл түймесі» модулі арқылы 5 жасқа дейінгі балалардың ата-аналары, жүкті әйелдер мен диспансерлік есепте тұратын науқастар бір түймені баса отырып, жедел жәрдемді шұғыл түрде үйіне шақыра алады. Бағдарламаны App Store және Google Play арқылы жүктеуге болады.


https://elana.kz/