Сыбайлас жемқорлықтың қоғам дамуына әсері

  Сыбайлас жемқорлық – мемлекеттің әлеуметтік-экономикалық дамуына, қоғамның тұрақтылығы мен азаматтардың әл-ауқатына кері әсер ететін күрделі мәселелердің бірі. Бұл – тек құқық бұзушылық қана емес, елдің болашағына, мемлекеттік институттарға деген сенімге және қоғамдық құндылықтарға әсер ететін құбылыс.Қазіргі таңда елімізде сыбайлас жемқорлықтың алдын алу және оған қарсы мәдениетті қалыптастыру бағытында жүйелі жұмыстар жүргізілуде. Мемлекеттік органдардың қызметіндегі ашықтық пен жариялылықты қамтамасыз ету, мемлекеттік қызмет көрсету сапасын арттыру, цифрлық технологияларды кеңінен енгізу – осы бағыттағы маңызды қадамдардың бірі.

       Сыбайлас жемқорлықтың қоғам дамуына тигізетін кері әсері, ең алдымен, азаматтардың мемлекетке деген сенімінен байқалады. Заң талаптарының баршаға бірдей орындалуы – әділетті қоғамның басты негізі. Егер қандай да бір мәселені заңды жолмен емес, таныстық, қызметтік байланыс немесе жеке мүдде арқылы шешуге болады деген түсінік қалыптасса, бұл қоғамның құқықтық мәдениетіне кері ықпал етеді.Сонымен қатар жемқорлық экономиканың дамуына да айтарлықтай кедергі келтіреді. Мемлекеттік қаражаттың мақсатсыз жұмсалуы, қызметтік өкілеттікті жеке пайдаға пайдалану, әділетсіз бәсекелестік – ел экономикасының әлеуетін төмендететін факторлар. Халықтың игілігіне бағытталуы тиіс қаражаттың тиімсіз пайдаланылуы әлеуметтік және инфрақұрылымдық жобалардың жүзеге асуына кері әсер етуі мүмкін

Мемлекеттік қызметте адалдық пен әділдік қағидаттарын сақтау – кәсіби міндет қана емес, азаматтық жауапкершілік. Халықпен тікелей жұмыс істейтін мемлекеттік органдар үшін бұл мәселенің маңызы одан әрі арта түседі. Азаматтардың өтініштері мен талаптарына заң шеңберінде, уақытылы және әділ жауап беру – мемлекеттік қызметтің негізгі қағидаттарының бірі.

        Сыбайлас жемқорлықтың алдын алуда қоғамның белсенділігі де маңызды рөл атқарады. Әр азамат өз құқықтары мен міндеттерін біліп, заңсыз әрекеттерге немқұрайлы қарамауы қажет. Жемқорлыққа қарсы мәдениет бір күнде қалыптаспайды. Ол отбасынан басталып, білім беру ұйымдарында жалғасып, еңбек ұжымдарында тұрақты құндылыққа айналуы тиіс.Әсіресе жас ұрпақтың бойына адалдық, еңбекқорлық, жауапкершілік және заңға құрмет сияқты қасиеттерді сіңіру – болашақ қоғамның негізін қалыптастырады. Өйткені жемқорлықсыз қоғам құру тек жазалау шаралары арқылы емес, ең алдымен, әр адамның ішкі ұстанымы мен саналы көзқарасы арқылы жүзеге асады.

        Сыбайлас жемқорлыққа қарсы іс-қимыл – белгілі бір мекеменің немесе жекелеген тұлғалардың ғана міндеті емес. Бұл – мемлекет пен қоғамның ортақ жауапкершілігі. Әрбір мемлекеттік қызметші өз жұмысын адал атқарып, әрбір азамат заң талаптарын сақтап, заңсыз әрекеттерге жол бермеуге ұмтылған жағдайда ғана нақты нәтижеге қол жеткізуге болады.

        Әділетті қоғам құрудың негізі – заңның үстемдігі, мемлекеттік қызметтегі адалдық және азаматтардың жоғары құқықтық мәдениеті. Сондықтан сыбайлас жемқорлықтың алдын алу бағытындағы жұмыстарды жүйелі түрде жалғастырып, қоғамда адал еңбек пен таза қызметті басты құндылық ретінде орнықтыруымыз қажет.