Мемлекеттік рәміздер – тәуелсіздік нышаны

Мемлекеттік рәміздер – кез келген елдің егемендігі мен тәуелсіздігін айқындайтын басты белгілердің бірі. Ту, Елтаңба және Әнұран – халқымыздың өткені мен бүгінін, болашағы мен мұратын біріктіретін қасиетті құндылықтар. Сондықтан мемлекеттік рәміздерді құрметтеу – әр азаматтың Отанға деген сүйіспеншілігінің, ел алдындағы жауапкершілігінің көрінісі.
Архив – халықтың тарихи жады сақталатын қасиетті мекен. Мұнда ұлттың өткені мен бүгінін байланыстыратын сан мыңдаған құжаттар сақталады. Тәуелсіз Қазақстанның қалыптасу тарихын зерделегенде мемлекеттік рәміздердің қабылдануы ел өміріндегі ең маңызды тарихи оқиғалардың бірі екеніне көз жеткіземіз. Өйткені рәміздер – тәуелсіздіктің айқын көрінісі, мемлекеттіліктің берік негізі.
1992 жылдың 4 маусымында Қазақстан Республикасының Мемлекеттік Туы мен Елтаңбасы ресми түрде бекітілді. Ал Мемлекеттік Әнұран уақыт талабына сай бірнеше рет жаңартылып, 2006 жылы қазіргі нұсқасы қабылданды. Бұл күн еліміздің тарихында ерекше орын алады. Себебі дәл осы күні жас мемлекет әлемге өзінің айрықша келбетін танытқан болатын.
Мемлекеттік Тудың көгілдір түсі – бейбітшілік пен ашық аспанның белгісі. Күн мен қыран бейнесі еркіндік пен жасампаздықты білдіреді. Ал ұлттық өрнек халқымыздың бай мәдени мұрасын айшықтайды. Елтаңбадағы шаңырақ – ортақ үйіміз Қазақстанның бірлігі мен тұтастығының символы. Қанатты пырақтар елдің өркендеу жолындағы асқақ арманын бейнелейді. Әнұран болса, халқымыздың рухын көтеріп, туған жерге деген сүйіспеншілікті дәріптейді.
Архив қорларында тәуелсіздік жылдарындағы қоғамдық-саяси өзгерістерді, мемлекеттік рәміздердің насихатталуы мен қолданылуын көрсететін көптеген құжаттар сақталған. Бұл құжаттар жас ұрпаққа тәуелсіздіктің қадірін түсіндіруге, елдік құндылықтарды дәріптеуге қызмет етеді. Өткенді танып-білу арқылы біз мемлекетіміздің қалыптасу жолын тереңірек түсініп, болашаққа нық қадам жасаймыз.
Бүгінде мемлекеттік рәміздер еліміздің барлық мекемелерінде, білім беру ұйымдарында, халықаралық деңгейдегі іс-шараларда кеңінен қолданылып келеді. Олар Қазақстанның әлемдік қауымдастықтағы беделі мен абыройын танытып, ұлттық бірегейлікті нығайтуға ықпал етеді.
Мемлекеттік рәміздерді құрметтеу – Туға тағзым ету, Елтаңбаны қастерлеу немесе Әнұранды орындаумен ғана шектелмейді. Бұл – ел тарихын білу, тәуелсіздіктің бағасын сезіну, Отанның дамуына өз үлесіңді қосу деген сөз. Сондықтан әрбір азамат мемлекеттік рәміздерді мақтан тұтып, олардың мән-маңызын келер ұрпаққа жеткізуі тиіс.
Тәуелсіздіктің тұғырын бекемдеп тұрған мемлекеттік рәміздер – халқымыздың рухани тірегі, ұлттық мақтанышы және жарқын болашаққа бастар темірқазығы. Оларды қадірлеу – елдігімізді құрметтеу, тәуелсіздігімізді ардақтау.
Ләззат Шонабаева,
Қызылорда облыстық мемлекеттік архиві
КММ Шиелі аудандық архиві филиалының инспекторы