Білім бәйгесінде тағы бір жарқын есім танылды. №46 А.С. Пушкин атындағы мектеп-лицейінің 11-сынып оқушысы Жүніс Әбдітағай республикалық «Алтын түлек» олимпиадасында топ жарып, жүлделі ІІ орынды иеленді.
Қазіргі қоғамда білім – ең құнды капитал. Ал сол капиталды игеріп, оны нақты нәтижеге айналдыру – екінің бірінің қолынан келе бермейді. Жүніс осы жолда өзінің еңбекқорлығын, алғырлығын және үздіксіз ізденісін дәлелдей білді. Оның әрбір есебі – тек формула мен санның жиынтығы емес, логика мен ойдың, жігер мен төзімнің нәтижесі.

Бұл жетістік – жеке дара шыққан шың емес. Оның ар жағында ұстаз еңбегі, бағыт-бағдар, сенім мен қолдау жатыр. Жас дарынның қабілетін ұштап, ғылымға деген қызығушылығын арттырған жетекшісі, математика пәнінің мұғалімі Балғабаева Айгүл – осы жеңістің үнсіз сәулетшісі.

Жүністің жеңісі – мектеп қабырғасынан асып, аудан абыройын асқақтатқан қуанышты сәт. Мұндай жетістіктер – өзгелерге жігер, кейінгі буынға бағдар. Ол – «еңбек етсең, еленесің» деген қағиданың нақты дәлелі. Жас дарынның жұлдызы жарық жанып, алар асулары бұдан да биік болғай!