Қоғамның мемлекеттік органдарға деген сенімі ең алдымен мемлекеттік қызметшілердің мінез-құлқы мен кәсіби мәдениетіне байланысты. Мемлекеттік саясатты тиімді іске асыру, халыққа сапалы қызмет көрсету және мемлекеттік аппараттың беделін сақтау – бүгінде әр мемлекеттік қызметшіден жоғары жауапкершілік пен этикалық өреде болуды талап етеді. Осы бағытта Қызылорда облысында 2025 жылдың қазан–қараша айларында мемлекеттік қызмет, қызметтік әдеп және сыбайлас жемқорлықтың алдын алу мәселелеріне арналған кең көлемді түсіндіру жұмыстары жүргізілді. Бұл шаралар ҚР Мемлекеттік қызмет істері агенттігінің Қызылорда облысы бойынша департаменті тарапынан ұйымдастырылып, өңірдегі түрлі деңгейдегі мемлекеттік органдарды, еңбек ұжымдарын және жастар аудиториясын қамтыды.

          Мәселен, Департамент пен облыс әкімдігінің бірлескен онлайн мәжілісі өткізіліп, жергілікті атқарушы органдар мен аумақтық бөлімшелердің басшылары, әдеп жөніндегі уәкілдер және кадр қызметі мамандарының қатысуымен мемлекеттік қызметшілердің әдеп нормаларын сақтау мәселелері талқыланды. Департамент басшысы Е.Мендалиев мемлекеттік қызметті өткеру талаптары, сыбайлас жемқорлықтың алдын алу тәсілдері және әдеп талаптарын бұзуға жол бермеудің маңыздылығын түсіндіріп, аймақта орын алған жекелеген бұзушылықтарға тоқталды. Ол діни нанымдарды мәжбүрлеп таңуға жол бермеу, ойын мекемелеріне барудан бас тарту, сондай-ақ қызметтік теңдік қағидатын сақтаудың аса маңызды екенін атап өтті. Сонымен қатар, мереке күндері мемлекеттік қызметшілердің көпшілік алдындағы мінез-құлқына ерекше назар аудару қажеттігін айтып, ұжымдағы моральдық-психологиялық ахуалды жақсартып жүрген қызметкерлерді көтермелеу шараларын қарастыруды ұсынды.

          Қазан айында облыстағы мемлекеттік органдардың әдеп жөніндегі уәкілдері мен кадр қызметтеріне арналған семинар ұйымдастырылып, қатысушыларға қызметтік әдеп нормаларын ұстану, мемлекеттік қызметте болуға байланысты шектеулерді сақтау және іскерлік этикеттің рөлі туралы кеңейтілген түсіндірме берілді. Сондай-ақ сауалнамаларды формальды түрде толтырмау, ұжымдағы әділдік пен өзара сыйластыққа негізделген қарым-қатынас қалыптастыру қажеттігі айтылды.

          Сондай-ақ, Департамент тарапынан университет студенттеріне арналған «Ашық есік күні» өткізіліп, жастарға мемлекеттік қызмет жүйесі, жаңа іріктеу тәртібі, мансаптық мүмкіндіктер мен мемлекеттік басқарудың ашықтық қағидаттары таныстырылды. Студенттер облыс әкімдігі ғимаратындағы негізгі залдармен танысып, мемлекеттік қызметтің маңыздылығы туралы қосымша түсінік алды. Департамент басшысы жастарды ел игілігі жолында қызмет етуге шақырып, болашақ мамандарға сенім артатындығын жеткізді.

          Қараша айында да бұл бағыттағы жұмыстар тоқтаған жоқ. Облысымыздың жергілікті атқарушы органдары мен орталық мемлекеттік органдардың аумақтық бөлімшелерінде өткізілген семинарларда мемлекеттік қызметшілердің ресми мінез-құлық стандарттары, діни бірлестіктерге мәжбүрлеп қатыстыруға жол бермеу, құмар ойындарға бару шектеулері және сыбайлас жемқорлыққа қарсы талаптарды сақтау мәселелері талқыланды.

          Жалпы алғанда, 2025 жылдың қазан–қараша айлары аралығында өткізілген іс-шараларда мемлекеттік қызметшілердің құқықтық сауаттылығын арттыруға, әдеп нормаларын терең меңгеруіне, кәсіби мінез-құлық мәдениетін нығайтуға және сыбайлас жемқорлық тәуекелдерінің алдын алуға бағытталды. Бұл кешенді жұмыстар мемлекеттік органдардың ашықтығын қамтамасыз етіп, қызметшілердің өзіне де, жалпы мемлекеттік аппаратқа да деген қоғамдық сенімнің артуына үлес қосады. Мемлекеттік қызметші үшін адалдық пен әділдікке негізделген қызмет мәдениетін қалыптастыру – қоғам алдындағы ең маңызды міндеттердің бірі екені айқын.