Қыс жақындаған сайын жылу беру маусымына дайындық та қыза түсуде. Осыған орай Шиелі ауданында қауіпсіздік шаралары күшейтілуде. Аудан әкімдігінің баспасөз орталығында өткен брифингте Шиелі ауданының Төтенше жағдайлар бөлімінің бастығы, азаматтық қорғау подполковнигі Ернұр Төребайұлы атқарылып жатқан жұмыстар туралы мәлімдеді.

Оның айтуынша, 2025-2026 жылғы жылыту маусымы қарсаңында тұрғын үйлерде өрт пен газдан уланудың алдын алу мақсатында кешенді шаралар қолға алынған. Атап айтқанда, табиғи газбен жылытылатын 60 үйге арнайы газ датчиктері орнатылған. Бұл – тұрмысы төмен, көпбалалы, жалғызбасты ана, мүмкіндігі шектеулі жандар тұратын отбасылардың үйлері. – Мұндағы тізім облыстық жұмыспен қамтуды үйлестіру және әлеуметтік бағдарламалар басқармасынан алынған деректер негізінде нақтыланды. Қазірдің өзінде қауіптің алдын алу бағытындағы алғашқы қадамдар жүзеге асырылды, – деді Е.Райымбеков. Сондай-ақ ағымдағы жылдың 15 тамызынан бастап аудан тұрғындары арасында өрт қауіпсіздігі ережелерін түсіндіру жұмыстары басталған. ТЖБ қызметкерлері ауылдық округтерді аралап, тұрғындарға қауіпсіздік шараларын егжей-тегжей түсіндіріп жүр. – Әрбір отбасы қауіпсіздік ережелерін білуі және сақтауы керек. Себебі қайғылы жағдайлардың көбі – қарапайым ережелердің ескерілмеуінен туындайды. Біз үшін әр тұрғынның өмірі мен амандығы – басты басымдық, – деді брифинг барысында бөлім басшысы. Жиын соңында БАҚ өкілдері сауалдарын қойып, нақты жауаптар алды. Мамандар қыс маусымында қауіпсіздікті қамтамасыз ету – тек құтқарушылардың емес, әр тұрғынның ортақ міндеті екенін еске салды.

Айнұр ИБРАШЕВА