Бүгінгі заман адамнан жылдам табыс, тез жетістік және шапшаң өзгерістерді талап етеді. Әлеуметтік желілер мен интернет кеңістігі осы үміт пен арманға толы жастарға «сәттіліктің құпиясын» уәде етіп, өзін «коуч» немесе «тәлімгер» деп таныстыратын жаңа «тұлғаларға» толы. Алайда бәрі бірдей шынайы емес. Жалған мотивацияның бұл әлемі – қауіпті иллюзия, ол адам сенімін пайдаланып, арманды алдауға әкеледі.

Жалған мотивация деп қалдық, бұл не өзі? Бұл – жылдам жетістік пен оңай табыс туралы жалған уәделер. Бұл құбылыс өзін-өзі дамыту мен бизнес тренингтерінің артында жасырылған алаяқтыққа ұқсайды. Олар «бір айда миллионер боласыз», «барлығы да сіздің қолыңызда» деген тартымды, бірақ шындыққа сай келмейтін сөздерді таратады. Мұндай «жетістік формуласы» көпшіліктің арманы мен үмітін пайдаланып, психологиялық қысым көрсетеді. Мұндай жүйелердің мақсаты – алдымен сендіру. Адамның ішкі әлсіздігін, өз-өзіне деген сенімсіздігін немесе өміріндегі қиын сәттерін пайдаланып, олар «құтқарушы» кейпінде пайда болады. Айқын өмірлік жолы, айтарлықтай жетістігі болмаса да, олар әлеуметтік желіде «мінсіз» бейнені қалыптастырады: сәнді көлік, шетелдік сапарлар, клиенттердің жалған пікірлері. Мұның бәрі – көрініс қана. Бұл – көз алдау арқылы сенім орнату. Жалған мотивацияның ең қауіпті тұсы – адамның ішкі ресурсын сарқуы. Бастапқыда «өзгеремін», «табысқа жетемін» деген үмітпен от алған жан, нәтиже шықпаған сайын өзін кінәлай бастайды. «Мен тырыспадым», «маған мотивация жетпеді», «мен әлсізбін» деген ойлар санаға сіңіп, ақырында күйзеліске, психологиялық дағдарысқа, кейде тіпті қаржылық қиындықтарға алып келуі ықтимал. Бұл – жалған коучтардың ең ауыр зардабы. Тағы бір ескерерлік мәселе – қысым мен манипуляция. Көп жағдайда мұндай «тренингтерде» қатысушыларды көпшілік алдында сынға алып, ұятқа қалдыру тәсілі қолданылады. Бұл – адамның қорғаныс қабатын бұзып, оны эмоционалды түрде әлсіретудің бір амалы. Әлсіреген адам – сенгіш келеді. Ал сенгіш адам – басқаруға оңай. Жалған коучтар көбіне нақты нәтиже емес, шабыт пен эмоция сатады. Олар сізге нақты білім, кәсіби кеңес бермейді. Оның орнына жарқын сөздермен көңіл-күйіңізді көтеріп, эйфория күйіне енгізеді. Бірақ ол – уақытша. Эмоция басылған кезде, адам қайтадан сол бастапқы орнына оралады. Ештеңе өзгермейді. Бұл – жалған мотивацияның заманауи тұзағы. Шынайы даму мен жетістікке жетудің жолы – ұзақ әрі күрделі процесс. Ол үшін нақты мақсат, білім, еңбек және шыдам керек. Кез келген адам бір күнде өзгермейді. Шынайы тәлімгер – сізге қысқа жол емес, дұрыс жолды көрсетеді. Ол сіздің әлсіз тұстарыңызды пайдаланып емес, керісінше, сіздің мықты жағыңызды дамытып көмектеседі. Бүгінгі таңда ақпараттың көптігі – оның шынайылығына күмәнмен қарауды талап етеді. Әсіресе, интернет пен әлеуметтік желіде таратылатын «табысты болудың оңай жолы» туралы кез келген уәдені сын көзбен қарау – әр адамның жауапкершілігі. Өмір – марафон. Оны «бір айда миллионер болу» ұранымен өлшеуге болмайды. Шынайы мотивация – сырттан емес, іштен басталады. Өз құндылығыңды, өз жолыңды тану – нағыз дамудың бастауы. Жалған образдарға, жалған уәделерге сенбей, ақиқатты іздеген адам ғана шынымен биікке көтеріле алады. Ал сіз бұл жөнінде қалай ойлайсыз, оқырман?