Шиелі аудандық қоғамдық даму бөлімінің «Жастар ресурстық орталығы» және "AMANAT" партиясы Шиелі аудандық филиалының ұйымдастыруымен "Ұлттық мұра" партиялық жобасы аясында аудандағы жұмыссыз, волонтер, белсенді, өзін-өзі жұмыспен қамтыған және жас мемлекеттік қызметкерлер Сауысқандық шатқалына танымдық экскурсияға барды.

Қаратау етегіндегі мыңжылдық тарихы бар петроглифтерді көру барысында Нартай Бекежанов музейінің қор сақтаушысы Нұрдәулет Нақыпов жастарға тасқа қашалған таңбалардың мән-мағынасын түсіндірді. Қола дәуірінен бүгінгі күнге жеткен суреттерде сол кездегі тұрмыс, аңшылық пен салт-дәстүр көрініс тапқаны айтылды.

Сақтық шаралары аясында жастардың қауіпсіздігін қамтамасыз ету үшін экскурсияға Шиелі аудандық көпбейінді орталық ауруханасының бір медицина қызметкері және полиция қызметкері де бірге барды. Шара соңында жастар Қаратаудың көркем табиғат аясында естелік суретке түсті.