Бүгін Премьер-министрдің төрағалығымен өткен Үкімет отырысында 2025 жылдың алғашқы жартыжылдығындағы құрылыс саласының даму қарқыны қаралды. Өнеркәсіп және құрылыс министрі Ерсайын Нағаспаевтың айтуынша, бұл салада тұрақты өсім байқалып отыр, деп жазады Egemen.kz.

Оның мәлімдеуінше, биылғы 6 айда құрылыс жұмыстарының жалпы көлемі 3,3 трлн теңгені құрады, бұл былтырғы сәйкес кезеңмен салыстырғанда 18,4%-ға артық. Мұндай оң динамика еліміздің 20 өңірінің 19-ында тіркелген. Бұл құрылыс индустриясының жалпы экономикалық өсімге белсенді үлес қосып отырғанын көрсетеді.

Биыл 19,2 млн м² тұрғын үй салу жоспарланса, оның 7,9 млн м²-сі алғашқы жартыжылдықта пайдалануға берілді. Бұл – өткен жылдың осы кезеңімен салыстырғанда 6,6%-ға артық көрсеткіш.

Ең жоғары өсім тіркелген өңірлер қатарына Түркістан, Ақмола, Ұлытау, Жетісу облыстары мен Шымкент қаласы енді. Сарапшылар мұны тұрғындарға арналған инфрақұрылымды дамытудың және инвестициялық ахуалдың жақсаруымен байланыстырады.