Президент «Үш жылдың ішінде Қазақстан жаңа тұрпатты ел болды. Саяси реформалар жан-жақты өзгерістер жасауға мүмкіндік берді. Жалпыхалықтық референдум арқылы Ата заңға түзетулер енгізіледі. Парламенттің құзыры кеңейді, Үкіметтің жауапкершілігі артты. Жергілікті билік түбегейлі жаңғыртылды. Конституциялық сот құрылды. Басқа да бағыттарда маңызды реформалар жасалды. Облыстық және аудандық мәслихат депутаттарының 90 пайызы бір мандатты округтен, яғни тікелей дауыс беру арқылы сайланды. Биылдан бастап барлық аудан әкімдерін халық тікелей сайлайтын болды. Билік жүйесінде мұндай ауқымды өзгеріс бұрын-соңды болмады. Ел ішіндегі өзгерістерге Ұлттық құрылтай мүшелері де орасан зор үлес қосты. Жұртымызды ортақ мақсатқа ұйыстырып, игі істерге жұмылдырды» деді. Онан әрі ҚасымЖомарт Кемелұлы бірқатар мәселеге арнайы тоқталып өтті. Қоғамда қызу талқыланып жатқан салық реформасы сөз болды. Осы реформа бойынша біздің облыстан сайланған Парламент мәжілісінің депутаты Мұрат Әбенов салық-бюджет мәселесіне қатысты орынды пікір білдірді. Қуанып қалдық.

Сонымен қатар әлеуметтік желідегі қоғамдық әдеп, жастар арасындағы жат діни ағымдар, ел ішіндегі түрлі алаяқтық әрекеттер туралы, фильмдерге қатысты қоғамдық сын, әйелдер калониясындағы ахуалға тоқталды. Сондай-ақ нашақорлық пен есірткі бизнесі, білім мен тәрбиенің әрдайым қатар жүруі керектігін сөз етті.

Құрылтайда ұлы Абайдың 180 жылдығы, қазақ тілі қоғамы, мәдениет және идеология саласы әңгіме болып, биыл ел астанасы Қызылордаға көшіру туралы тарихи шешімнің қабылданғанына 100 жыл толғаны, халқымыздың «қазақ» деген байырғы атауы да бір ғасыр бұрын қайтарылғандығын баса айтты. Ең ғажабы, Құрылтайдың келесі отырысын Сыр бойында, кезінде қазақ елінің астанасы болған Қызылорда қаласында өткізу ұсынысын жасады. Тағы да басқа мәселелер көтерілді. Ол үшін Президенттің сөзін аяғына дейін оқып шыққандарыңызды қалар едім.

Қ.Тоқаев сөзін қорытындылай келіп «Біздің ұлтымыздың арман-мұраты әділетті, қауіпсіз, таза, қуатты Қазақстанды құру идеясынан бастау алады. Заң мен тәртіп – біздің мызғымас тұғырымыз. Бұл ең алдымен, еліміздің әр азаматына және барша халқымызға ортақ тәртіп» деді. Заң орындалса, тәртіп орнаса, еліміздің тұғырлы болатындығы аян. Құрылтайда көтерілген мәселелерді қолдай отырып, біз де елімізге құт-береке, бірлік пен ынтымақ тілегенді жөн санадық.