Дана халқымыз қай кезде де өзінің болашағы – жастардың тәрбиесіне ерекше көңіл бөліп, басты назарда ұстаған. Ұлт пен ұлыстың аманатын арқалаған жас өскінді тәрбиелеудің түрлі жолы арқылы, елдің ертеңі болатын жас ұрпақтың бойына ұлттық құндылықтарды сіңіріп, рухани кемел азамат болып қалыптасуына барлық жағдай жасалуда.

Сәрсенбі күні Көкшоқы мөлтек ауданында орналасқан Жастар ресурстық орталығының жасыл желекке оранған алаңында ардагерлер жастармен жүздесті. Тағылымға толы кездесуде аудан ардагері Ғани Есімов, су шаруашылығының үздігі Әлияр Сейітов, аудандық әйелдер кеңесінің төрайымы Найля Палымбет, Бәйтерек ауылдық округі әйелдер кеңесінің төрайымы Разия Ысқақова қатысып, жүздесудің мән маңызының жоғары екенін айтып, қатысушы жастарға өмірлік азық болар өнеге-өсиеттерімен бөлісті.

Сондай-ақ ашық аспан астындағы мазмұнды кездесуде аудандық қоғамдық даму бөлімінің басшысы Кенжехан Есенбаев қазыналы қарттар мен ақ жаулықты аналарға, жас буын өкілдеріне алғыс білдіріп, сан салада абыройлы қызмет істеп жүрген жастарды марапаттады.

Әрі қарай кездесудің сәнін әсем әнмен келтірген ақ күріштің атасы Ыбырай Жақаев ауылының «Асыл әжелер» ансамблі көрерменнің ыстық ықыласы мен қошеметіне бөленді.

Бүгінде бұл орталықта 530 түп жеміс-жидек ағашы мен гүлдің 12 түрі тамырын тереңге жайып, жайқалып тұр. Бұл көз тартар көрініске куә болған ардагерлер жасыл желекке бөленген жастар орталығының болашағы жарқын екенін тілге тиек етіп, сенімдері молая түсті.

Жиын соңында қазыналы қарттарын төрге шығарып, құрмет көрсеткен Жастар ресурстық орталығының директоры Ержан Әбдешов мекеме аумағын көркейту-көгалдандыру барысында ақыл-кеңесін айтып, бағыт-бағдар берген Әлияр Сейітовке аудан жастарының атынан алғаусыз алғыс білдіріп, дәстүрге сай иығына шапан жапты.