Өркен Көшер – пластик құбырдан өзіне велосипед жасаған өнертапқыш. «Болар бала жасынан» дегендей Өркен ес білгеннен ойыншықты құрастырып ойнауға құмартқан. Ал екінші сынып оқып жүріп легодан есіктері ашылып-жабылатын машина жасап шыққан. Оны өзі «пицца сататын көлік» деп атапты. Бүгінде 7 сыныпта оқитын Өркенді қолдан құстың ұясын, орындық пен желдеткіш жасаудың шебері деуге болады. Әкесі Ерік Нұрмағанбетов – Шиеліде туып-өскен. Отбасын құрып, жұмыс бабымен облыс орталығына көшкенімен, балаларын ата-әже тәрбиесінен ажыратпапты. – Біз қалада тұрғанымызбен, балалар көбіне ата-әжесінің қолында, ауылда болды. Өркеннің атасы Көшер – теміржол саласының ардагері, ағаш ұстасы, әжесі – Қалбибі де оюлы кілемдер тоқыған қолөнер шебері. Ес білгеннен солардың тәлім-тәрибесін алған Өркенге ата-әжесі көп ықпал етті. Атасы бірнәрсе жасаса үнемі қасынан қалмай жүгіріп жүретін. Кейін өзі де әртүрлі бұйым жасай бас­тады. Велосипед жасаймын дегенде онша мән бермедім «қой, балам қолыңды күйдіріп аласың» деген едім. Бірақ алған бетінен қайтпай, құрастырып шыққанда риза болдық, – дейді әкесі Ерік Көшерұлы. Ерік пен інісі Мақсат Нұрмағанбетовтер Шиелідегі «Нұрбер» сантехникалық дүкенінің иелері. Әкесі мен ағасының жанына ілесіп жүретін Өркен дүкенде ең көп сатылатын плас­тик құбырға қызығушылығы артады. «Бұны не мақсатта пайдаланады? Қанша градуста қызиды? Құбырды тек су мен жылудан басқа да мақсатта пайдалануға болады ғой» деген секілді сан сауалға жауап алуға құмартады. Сөйтіп алғашқыда құбырдан жылуы бар орындықты жасап шығады. Ойлаған дүниесінің сәтті шыққанына қуанған Өркен келесі кезекте велосипед жасағысы келеді.

– Велосипедті бір айда жасадым. Басында ойдағыдай бола қоймады. Бірақ қайтсемде жасап шығамын деп мақсат қойдым. Қажетті құралдарына 30-35 мың теңгедей қаржы кетеді, 50-60 келі салмақты көтереді. Сантехникалық құбырды 300 градуста қыздырып, ерітіп бір-біріне жалғап шықтым. Бұл велосипедке жылу жүргізуге де болады. Келесі кезекте пластикалық құбырдан үлкен киіз үй жасауды ойластырып жатырмын. Ағаш сынса қалыпқа келмейді, темір – шіриді, ал пластик ұзақ уақытқа шыдайды, сынса да қалыпқа келтіру оңай. Сондықтан осы материалды таңдадым, – дейді өнертапқыш Өркен. Өркенді әлеуметтік желіден байқап қалған инвестор, бизнес-философ, қоғам қайраткері Марғұлан Сейсенбай онымен кездескісі келетінін жариялайды. Көп ұзамай Өркен әкесі және ағасымен бірге танымал тұлғамен жүздеседі. Бұл туралы М.Сейсенбай өзінің әлеуметтік желідегі парақшасында: – ...Мен Өркенге мидың өзінің барлық армандарын шындыққа айналдыра алатын ерекше орган екенін айтып жеткізуге тырыстым. Оның бойындағы креатив пен табысқа жету талпынысы арасында тікелей байланыс орнағанын қаладым. Идеяда бастысы оның масштабы емес, бірегейлігі екенін көрсеттім. Оның кішкентай ғана креативті идеясы менің оны іздеуіме себепші болғанына назар аудардым. Идеялар осындай мықты күшке ие! Оған қазақтың Илон Маскы бол деп батамды бердім және оның болашағын қадағалап отырамын деп уәде бердім, – деген жазба қалдырған. Ұлының жетістігіне қуанған анасы Айгерім Алмаханова: – Өркен – бес баланың ортаншысы. Кішкентайынан лего құрастыруға қызығады және құрылыс құралдарынан, ағаштан бұйымдар жасайтын өнері бар. Марғұлан Қалиұлы оны әлеуметтік желіден көріп, шақыру жасады. Алланың қалауымен Марғұлан Қалиұлының батасын алды. Ол Өркенге Ұлыбританияға ағылшын курсына жолдама, электро велосипед сыйлады. Өркеннің алдағы өміріне үлкен мотивация болды. Ата-анасы ретінде қуанышымызда шек жоқ. Марғұлан Қалиұлына алғысымызды білдіреміз, – дейді. Қазақ жері он саусағынан өнер тамған шеберлерге кенде емес. Ұлттық өнердің алтын арқауы саналатын қолөнершілердің ізін заманға сай жалғаған Өркеннің өнері көрген жанды тамсандырмай қоймасы анық. Заманынан оза туған өнертапқыш ұлға Жаратқан сыйлаған қарым-қабілет пен көңілі құлай сүйген іс арқылы елге қалтқысыз қызмет етсін деп тілейміз.