Отбасының қазығы, алтын діңгегі – бала. Адам ұрпағымен мәңгі жасайды. Баланың саналы, тәрбиелі, ақылды болып өсуіне берекелі отбасының әсері мол. Шаңырақтың әрбір мүшесі бір-бірімен сөйлесіп, түсінісе отырып қарым-қатынас жасауы өскелең ұрпақтың білімпаз болып қалыптасуына жол ашады. Психологтар бұл пікірмен келісе отырып, отбасыдағы жақын адамдардың өзара береке-бірлікте, сүйіспеншілік пен махаббатта араласуы, баланың өз-өзіне сенімділігін тудырып, аяғын шалыс басудан сақтайтынын айтады. Туған үйдің жылуы жеткіншектердің көкірегінде көп жылдар бойы сақталып, оның жанашыр азамат болып өсуіне игі әсерін тигізеді.
Шиелі ауданының 95 жылдығы мен отбасы күні мерекесіне орай, Шиелі ауданының қоғамдық даму бөлімінің «Жастар ресурстық орталығы» КММ-нің, «Қызылорда облысының жастар одақтары» қоғамдық бірлестігінің ұйымдастыруымен «Менің бақытты - отбасым» атты фото бәйге өтті.

Байқауға 14 жас отбасы қатысып, отбасылық фотоларын ұсынды. Жастар ресурстық орталығының директоры Ержан Әбдешов жеңімпаз отбасыларды мерекелерімен құттықтап, ізгі тілегін жеткізіп, марапаттады. Жүлделі бірінші орынды Тілеулиевтер отбасы жеңіп алса, ІІ орын Айтмағамбетовтер отбасына, ІІІ орын Жүсіповтер отбасына бұйырды. Жеңімпаздарға бағалы сыйлықтар мен арнайы диплом табысталды.