Елбасымен жүздесіп, батасын алған аймақтағы ең жас жыршы қыз Қармақшы ауданында тұрады. Жүз шайырын жүзіктеген әйгілі Тұрмағамбет аулының тумасы бүгінде Президент сыйға берген киелі домбырамен жыр, терме айтып, бабадан қалған саф өнерді ұлықтап жүр. Бағамдасақ, Тұңғыш Президентпен жүздесіп, оның қолынан сый алу кез-келген адамға бұйыра бермейтін бақ. Нұрсұлтан Әбішұлының бір ауыз сөзі шынашақтай қыз баланың жүрегінен жол тауып, өн бойына ерекше күш бітіргені соншалықты, Арай сол кездесуді әрдайым еске алумен жүреді екен.