Қуатты мемлекеттің негізгі тіректеріне еңселі экономикасын, сапалы білімін, жоғары денсаулық сақтау саласын жатқызуға болады. Сапалы білім арқылы саналы ұрпақ өсіп-өркендемесе, экономикамыз есіктен төрге жете алмай қалары анық. Дегеніне жетемін деген азаматтың денсаулығы мықты болмаса, сапалы білімнің де сапары қысқа болары сөзсіз. Сайып келгенде, елдің елеулі жетістікке жетуі өміршең медицинасымен өлшенері хақ.
Міндетті әлеуметтік медициналық сақтандыру – денсаулық сақтау мүддесін әлеуметтік қорғаудағы мемлекеттік жүйе. Бұл модель дүние жүзінің көптеген елдерінде қалыптасқан. Оның ішінде Ұлыбритания, Испания, Италия, Швеция, тағы басқа елдер бар. Қазақстан МӘМС қабылдауда әлемнің 50-ден аса мемлекетінің сақтандыру тәжірибесіне сүйеніп, өз жобасын түзген. Халықтың денсаулығына ден қою одан сайын маңыздана түскен қазіргі сын сағатта әлеуметтік медициналық сақтандыру қорының жұмысы ерекше назарда.

Бүкіл әлемге орасан қауіп-қатерімен келген бейдауа дерт соңғы жылдары еліміз үшін үлкен сынақ болғаны анық. Індет қос бүйірден қысқан осынау сын сағатта медициналық қызметтердің жүйелі ұйымдастырылуына әлеуметтік медициналық сақтандыру қоры өз үлесін қосуда.

Расында, ұлт саулығы үнемі мемлекеттің назарынан шыққан емес. Ал, міндетті медициналық сақтандыру жүйесін дамыту бұл барша халықты сапалы медициналық қызметпен қамтамасыз ететіні сөзсіз. Құзырлы құрылымдар өкілдерінің айтуынша, медициналық сақтандыру жүйесінің негізгі тиімділігі – азаматтар емхана мен дəрігерді еркін таңдап, сақтандыру бойынша əлеуметтік сақтандыру қорымен келісім-шартқа отырған жекеменшік клиникаға да тіркеле алады. Сондай-ақ, тұрғындардың бағасы қымбат тұратын диагностикалық, лабораториялық зерттеулерді тегін алуға мүмкіндігі бар. Бұл жүйе Қазақстанның барлық сақтандырылған азаматтарын жасына, əлеуметтік мəртебесіне, тұрғылықты жері мен табысына қарамастан, тең дəрежедегі медициналық жəне дəрілік көмекпен қамтамасыз етеді.