Қазақстан аумағында дауылды ескерту жарияланды, деп хабарлайды Stan.kz ақпарат агенттігі. Жауын-шашын мен қар жамылғысының әсерінен қар көшкіні жүреді. "Қатты жауын-шашынға және қар жамылғысының тау беткейіндегі тұрақсыз күйіне байланысты Үлкен және Кіші Алматы су алабтарында 2 – 3 ақпан аралығында қар көшкіні жүруі мүмкін. Көшкін жүру қаупі мүмкін болуына байланысты, қарлы тік жартастарға шығу ұсынылмайды. Тауда абай болыңыздар", - дейді синоптиктер. Солтүстік-батыс циклонының жырасы Қазақстан территориясы арқылы тез жылжи отырып, еліміздің солтүстік бөлігінде қар мен жаңбыр түріндегі жауын-шашын, көктайғақ, желдің күшеюін, сонымен қатар ауа температурысының жоғарлауын алып келеді. Ал республиканың оңтүстік бөлігі жоғары қысым аумағында орналасатын болғандықтан, жауын-шашынсыз ауа райы күтіледі. Республиканың кей жерлерінде тұман күтіледі.
"Солтүстік Қазақстан облысында кей жерлерде тұман, жаяу бұрқасын, көктайғақ, басым бөлігінде желдің 15-20, екпіні 23 м/с күшеюі күтіледі. Ақмола, Қостанай облыстарында кей жерлерде тұман, жаяу бұрқасын, көктайғақ, түнде басым бөлігінде, күндіз кей жерлерде желдің желдің 15-20, екпіні 23-28 м/с күшеюі күтіледі. Павлодар облысында кей жерлерде тұман, жаяу бұрқасын, көктайғақ, түнде кей жерлерде, күндіз басым бөлігінде желдің 15-20, екпіні 23 м/с күшеюі күтіледі. Шығыс Қазақстан облысының кей жерлерінде тұман, бұрқасын, көктайғақ, желдің 15-20, күндіз екпіні 25 м/с күшеюі күтіледі. Қарағанды облысында кей жерлерде тұман, желдің 15-20 м/с күшеюі, күндіз – көктайғақ күтіледі. Тәулік бойы Батыс Қазақстан, Ақтөбе, түнде және таңертең Алматы облыстарында кей жерлерде тұман, көктайғақ күтіледі. Жамбыл, Түркістан, Қызылорда, Маңғыстау, Атырау облыстырында кей жерлерде тұман күтіледі",  дейді Қазгидромет.