Ең бақытты жұптың өзі күніне бір мәрте болса да ұрысатын себеп табады. Неге тұрмыстық жағдайлар отбасын ойрандайды, қарым қатынаста тепе-теңдікті қалай сақтауға болады? Бұл сұрақтар кез келген адамды ойландырады. Отбасылық өмірді тұмандандыратын не? Жігіт пен қыз боп жүргенде барлығы тамаша болады, уақыт өте келе өмірдің келесі кезеңіне аяқ басып, бірге тұруы керек. Отбасылық өмірдің ыстық, суығы басылғаннан кейін арада түсініспеушілік туындап, бұрын көрмеген қырларын тани бастайды. Әйелі ыдысты жумайды, күйеуі қоқысты төкпейді, жұмыстан шаршап келгенде үй жиналмайды... Осы секілді ұсақ-түйектер жүйкені жұқартып, негатив жинала береді, бір күні біреуі "жарылады". Әрине, ұрыс-керіс бір ғана себептен туындамайды. Бір шаңырақ астында тұрғанда ең көп кездесетін мәселе – қаржылық жағдай. Пәтер ақысын төлеу, күнделікті ішіп-жеуің, киім-кешегің, керек-жарағың – барлығына бірдей ақша керек. Есеп жүргізбесе, қажеттіліктің барлығына бірдей жеткізу мүмкін емес. Осылай тағы да жанжал шығаруға себеп табылады. Әйелі "аз ақша табасың" дейді, күйеуі "берекесін келтіріп жұмсай алмайсың" дейді. Осылай күн сайын ұрыс-керіспен өмір сүруден екеуі де шаршап, екң жаққа кетіп тынуы мүмкін. Тұрмыстық жағдайларға байланысты келіспеушілік тумауы үшін бірнеше ереже жасауға болады. Ең басында барлығын ақылдасып, әркім өзі жауапты істерді бөліп алғаны жөн. Ұсақ түйектердің жанында қарым-қатынасты сақтап қалу маңызды екенін естен шығармай, мәселені айқай-шусыз шешу. Адамдар неге жанжалдасады? Мәселе туғанда барлығы бірдей шешімін табуға тырыспайды. Көпшілігі әдіптің артын бағып, соңына дейін шыдап келеді де, шыдам шегіне жеткенде барып шу шығарады. Кез келген түйткілді мәселені дереу шешіп алған жөн және ескі өкпе-наздың бәрін қозғамай, ең маңызды деген мәселені сөз етіп, басқа кемшіліктерін бетіне баспай, бір-біріне мін тақпай, ұрыс-керіссіз, бәсең дауыспен сөйлесе отырып шешімін тапқан дұрыс. Ал қаржылық жағдайға келер болсақ, тұрмыс құрмай тұрып шамамен қандай жағдайда өмір сүретініңді болжап, сол жайға көндіге алатындай болған кезде ғана шешім қабылдау керек. Егер болшақ жарыңыз ауадан да ақша жасайтын ірі кәсіпкер болмаса, үйленгеннен кейін бәрі өзгереді, ақшасы көбейеді деп ертегі құрастырудың қажеті жоқ.