Амал дәптерім амалсыз сыр ақтарғанда,
Мәңкір мен Нүңкір қапаста сұраққа алғанда,
Көріп те көрмей жасаған күнәларыма
Ата-ана, бауыр, жұбайым құлақтанғанда,
Не істеймін?

Сынақ өмірге қонақ қып сынаған Алла
Күнә жасамау мүмкін бе мына ғаламда?
Қарыстан ұзын кимеген қарындастарға
Қарап едің деп қос көзім кінәлағанда
Не істеймін?

Тар қабір қысып қинаса тайқып көр пенде,
Бұлай болмас деп өкініп қайта келгенде,
Әке-шешеден талайды қайырып ең деп
Аузым барлық күнәмды айтып бергенде
Не істеймін?

Кеудеден мына жан кетіп жайрағанымда,
Алдыма келіп өзгені қайрағаным да,
Намаз оқудың парызын естірттім, бірақ
Бейнамаз жан деп қос құлақ сайрағанын да
Не істеймін?

Көремін бәрін қабірде қанықты еткенде,
Ажал қармаса қалады ғаріп боп пенде.
Осы дүниедегі бермеген қарыздарымды,
Арғы дүниеде сауаптан алып кеткенде.
Не істеймін?

Құр жүрмей енді құраннан хат танып кетсем,
Сұрақ-жауапқа жәй жүрмей баптанып кетсем,
Сәждеге маңдай қоямын деп ниет қып жүріп,
Сәл кідірместен ар жаққа аттанып кетсем.
Не істеймін?
Бекжан Ержігіт