Татулық, ауызбіршілік, бейбітшілік – біздің басты байлықтарымыздың бірі. «1 мамыр – Қазақстан халқының бірлігі» күні қарсаңында кенттің шығыс жақ беткейіндегі тұрғындары (әл-Фараби) халықтың басын қосып, ас беріп, құраннан дұға бағыштады.
Жылдағы дәстүрлі тасаттық құлшылығын өтеуді осы жылы тұрғындар арнайы мерекеге орайластырған екен. Шараға жастар жағы ауызбіршілік танытса, оны тұрғындар қолдап, кәсіпкерлер демеушілік көрсеткен. Қаз-қатар бес шатыр тігілсе, ақ киізге оранған қараша үй өз алдына бөлек халыққа қызмет жасады.
Тігілген шатырға екі мыңға жуық адам бас сұғып, әзірленген астан дәм татты. Ал ауданның бас имамы Бақыт Ұлжаев елдің ауызбіршілігі мен ынтымағын арттыратын, сауапты іске шақыратын уағыз айтып, құран оқып, елдің амандығы үшін дұға жасады.


Е.БАЛТАБАЙҰЛЫ.