ҚР Ұлттық экономика министрі Тимур Сүлейменов 2018 жылы мұнай өндірудегі болжамды жария етті.
Оның атап өтуінше, мұнай өндіру көлемі 2017 жылғы деңгейден кем болмауы тиіс. «Біріншіден, баршамызды құттықтап, біздің мұнайшыларға алғысымызды айтуға болады. 86,2 млн тонна көлеміндегі шикізат рекордтық көрсеткіш болып отыр. Бұл өз кезегінде (2017 жылы) 4 пайыздық жалпы ішкі өнім өсіміне жетуіне айтарлықтай әсер етті. Биылға Энергетика министрлігіндегі әріптестеріміз мұнай өндіру көлемі шамамен осы деңгейде болатынын немесе біршама жоғары өндірілетінін жоспарлап отыр. Макроболжамды талқылау кезінде Энергетика министрлігі нақты көрсеткіштерді жариялайды», – деді Т. Сүлейменов Үкімет отырысынан кейін. Ал мұнай бағасына болжам тұрғысында Ұлттық экономика министрі барреліне 45 доллар көлеміндегі ресми макроболжамға сілтеме жасады. Бұдан бұрын хабарланғандай, Тимур Сүлейменов 2017 жылы Қазақстанда жалпы ішкі өнімнің өсімі 4 пайызды құрағанын айтқан еді.
inform.kz