Елбасының биылғы Жолдауын орындау барысында «Нұр Отан» партиясы жанындағы Құқықтық кеңестің «Кәсіпкерлік қызметті жетілдіру: төртінші өнеркәсіптік революция жағдайындағы заңнаманың маңызды новеллалары» атты кеңейтілген отырысы өтті.
Парламент Мәжілісінің Заң­нама және сот құқықтық реформа комитетінің төрағасы, «Нұр Отан» партиясы жанындағы Құқықтық кеңесінің төрағасы, заң ғылымдарының докторы, про­фессор Нұрлан Әбдіровтың төра­ғалығымен өткен жиында Пар­ламент Мәжілісінде талқы­ланып отырған «Қазақстан Рес­пуб­ликасының кейбір заңна­малық актілеріне кәсіпкерлік қызметті реттеуді жетілдіру мә­селелері бойынша өзгерістер мен толық­тырулар енгізу туралы» заң жобасы талқыланды.
Шараға Парламент депутат­тары, «Нұр Отан» партиясы жа­нындағы Құқықтық кеңестің мүшелері, мемлекеттік ор­ган­дар­дың, үкіметтік емес ұйымдардың өкілдері мен бейне-байланыс ре­жимінде өңірлерден кәсіпкерлер қатысты.
Баяндама оқыған Ұлттық эко­номика вице-министрі Серік Жұманғарин кәсіпкерлікті же­тілдіру мақсатында 13 кодекс пен 100 заңға барлығы мыңға жуық тү­зетулер енгізілетінін айтты. «Биз­нес шығындарын қайта рет­теу және азайту, әкім­шілік тос­қауыл­дарды жою және кәсіп­керліктің дамуын ынта­лан­дыру бойынша жүргізіліп жатқан сая­сатты ескере отырып, заң мы­надай бағыттар бойынша әзірленген: мемлекеттік ба­қы­лау-қадағалау қызметін ре­формалау, ақпараттық құралдарды реттеу, табиғи монополия субъектілері мен квазимемлекеттік секторы көрсетілетін міндетті қызметтерді реформалау, реттеушілік әсерді талдауды жетілдіру, бизнес шы­ғындарын тұтастай азайту, бә­секелестікке кедергі келтіретін нормаларды айқындау және алып тастау, баға мен тарифтік келі­сімдерді айқындау және Doing Business бизнес рейтингісінде Қазақстаның позициясын жақ­сарту» дейді Серік Жұманғарин.
Қазіргі кезде Дүниежүзілік банк есебінше, Doing Business – 2018 бойынша Қазақстан был­тырғыға қарағанда бір сатыға төмендеп, 36 орынға түскен.
Алдағы уақытта Кәсіпкерлік кодексі мен салалық заңдарға мемлекеттік бақылау-қадағалау қызметін реформалау бойынша «кемшілікті анықтау және жаза қолдану» саясатынан «алдын алу және ескерту жасауға» көшу ту­ралы өзгерістер енгізілмек. Ре­формалаудан кейін субъектілерді тексеру жұмыстары, яғни тәуе­кел­дерді бағалау жүйесі және жос­­пардан тыс тексерулер 30 күн­­нен 10-15 күнге дейін қыс­қармақ.
− Мемлекеттік органдардың қызметкерлері профилактикалық бақылау аясында бизнес нысан­да­рын тексеруге шығу кезінде кем­шіліктерді жоюы қажеттігі туралы ақпараттық ескерту шы­ғарады, ал үлкен кемшіліктер жасалса, жоспардан тыс тексеруге құқылы. Бұл кезекте субъектілер, ескертулер орындалғаны туралы ақпарат берулері тиіс. Бұл бизнес ортада дұрыс жүйе қалыптас­тырмақ деген ойдамыз, − дейді Серік Жұманғарин.
Сондай-ақ шара барысында ауыл шаруашылығы коопе­ративін құру кезінде туындап отырған мәселелер, жұмысқа қабылдарда мамандар білік­тілігінің төмен болуы, кадр бі­ліктілігін арттыруға қатысты түйткілдер қозғалды.
Шара қорытындысында қа­ты­сушылар Ұлттық экономика, Әділет, Ақпарат және комму­ни­кациялар, Ауыл шаруашылығы министрліктеріне, «Азаматтарға арналған үкімет» МК-ға, жергі­лікті атқарушы органдарға және «Атамекен» ҰКП-на аталған заң қабылданғаннан кейін жаңа өзге­рістер туралы тұрғындар мен кәсіп­керлерге түсіндірілсін деген ұсы­ным жасап, бірқатар тапсыр­малар берді.
Нұрай РАХЫМ