АСТАНА. KAZINFORM — Қыркүйек айында Жапонияда аюдың адамдарға шабуылы соңғы он жылдағы ең жоғары көрсеткішке жетті, деп хабарлайды Belta. Өткен айда жыртқыш аңнан 39 адам зардап шеккен. Мамандар бұл соңғы 10 жылдағы ең жоғары көрсеткіш екенін айтады. Елде сәуір айынан қыркүйек айының соңына дейін аюдан 109 адам зардап шегіп, оның бесеуі қайтыс болды. Қазан айының алғашқы аптасында аюлар 17 адамға тап бергені анықталды. Оның біреуі жыртқыш аңның шабуылынан қаза тапты. Ал күні кеше ғана Гунма префектурасында аю супермаркетке кіріп, екі адамды жарақаттады. Сарапшылар аюдың шабуылын аймақтардағы дәнді-дақылдардың егістігімен байланыстырады. Мұндай аюлар өз елімізде де тұрғындардың зәресін алды. Қазір Шығыс Қазақстан және Абай облысында тұрғындар ашыққан аюлардан үрейленіп отыр.
