Ауғанстанды билеп отырған «Талибан» қозғалысының өкілдері алғаш рет Біріккен Ұлттар Ұйымының климат өзгерісі жөніндегі саммитіне қатысады. Жиын бүгін Бакуде басталады. Ауғанстан Сыртқы істер министрлігінің хабарлауынша, тәліптерді халықаралық жиынға Әзербайжан бақылаушы ретінде шақырған. Делегация пікірталастарға қатысып, екіжақты кездесулер өткізеді. Бірақ «Талибан» өкілдеріне негізгі отырыстарда бой көрсетуге тыйым салынған. Өйткені бұл ұйым Ауғанстанның ресми үкіметі ретінде халықаралық деңгейде әлі мойындалмаған. Бұған 2021 жылы Кабулдағы орталық билікті күшпен басып алуы себеп. Сондай-ақ елдегі қыз-келіншектердің емін-еркін жүріп-тұруы мен құқықтарын шектеу де тәліптерге деген теріс көзқарас қалыптастырып отыр.