Кайфын, Қытай, BAQ.KZ тілшісі. Мың жыл бұрынғы Қытай. Бұл кезеңді қылқалам шебері Чжан Цзэдуан кезінде шебер суреттесе, кейін осы туынды негізінде Кайфын қаласында саябақ салынды.

Осыған орай, саябақ Millennium City Park деп аталған. Баққа кіреберісте суретші Чжан Цзэдуанның ескерткіші орнатылған. Оның қолында түтікше етіп оралған туындысы да бар. Кайфындағы парк – осы қылқалам шеберінің ХІ ғасырдың соңы -ХІІ ғасырдың басында салған «Марқұмдарды еске алу мерекесінде – өзен бойымен» суретінің репродукциясы. 


Одан әрі жүрсеңіз, қабырғада сол картинаның көшірмесі бейнеленген. Осы суретті және жалпы саябақты көруге жыл сайын миллиондаған турист келеді екен.  




Туынды түпнұсқасының ұзындығы - 5 метр. Ол Бейжің қаласындағы «Тыйым салынған қала» музей кешенінде сақтаулы. 



Суретте Сун әулеті (960-1127) кезіндегі Кайфын қаласының тыныс-тіршілігі, табиғаты бейнеленген. Одан адамдар, жануарлар, үйлер мен басқа да құрылыс нысандарын көруге болады. Бұл туындыны көбі сол кездегі өмірдің энциклопедиясы деп те атайды. 



Millennium City Park таңғы сағат 9.00-дан түнгі сағат 22.00-ға дейін жұмыс істейді. Бақ аумағы өте үлкен болғандықтан кіреберісте арнайы карта орналасқан, онда барлық қажетті ақпарат көрсетілген. Бұған қоса әр келушінің қолына билетпен бірге шағын карта беріледі. 



Саябақ құрылысы 1992 жылы басталып, 1998 жылы аяқталған. Ол жыл бойы үзіліссіз жұмыс істейді. 



Демалыс орны Кайфын қаласына кіреберісте, өзен жағалауында орналасқан. 


Сондықтан бұл жерде қалаған қайығыңызды жалға алып, жүзуге болады. 



Қайықтың барлығы мың жыл бұрынғы кезеңнен әкелінгендей көрінеді. Олар ағаштан көне стильде ойылып жасалған. 


Бұндағы барлық ғимараттар тарихтан сыр шертеді. 


Сәулеті ерекше нысандар көп. 


Сондықтан саябақтың кез келген жерінде суретке түсіп жүрген туристерді жиі кездестіресіз. 


Гүлдер де аз емес. Жалпы, мұнда өсімдіктің түр-түрі өседі. 


Мәселен, жыл сайын қарашада бақытгүл, яғни хризантема фестивалі өтеді. Шара бір ай жалғасады және фестивальде кемінде 1 мың түрлі хризантема түрін тамашалауға болады.

Бір байқағанымыз, бұл жерде де, Қытайдың ірі қалаларында да көшеттер ерекше күтімде. Олардың көбі осылай отырғызылған. Әдетте, ағаштардың түбі әктеледі не матаға оралады. Бұған қоса жан-жағы бұталармен бекітіледі. 


Балалардың демалысына да көп көңіл бөлінген. Балғындарға арналған ұлттық киімдер, ойыншықтар мен тәттілер сатылады. Қызықты ойындар мен шоулар өткізіледі. 


Осындай ойыншық атқа да отыруға болады. 


Ал егер мынадай ат керек болса, ол да бар. 


Ипподром да қарастырылған. Бұл жерде түрлі ұлттық ойындар мен сайыстар өткізіледі. 


Күн сайын түрлі мәдени шаралар ұйымдастырылады. Ұлттық ойындар мен театрландырылған қойылымдар келушілер назарына ұсынылады. 



Мәселен, күн жылы кезде өзенде, суы қатқан кезде де мұз үстінде мыңға жуық адамның қатысуымен түрлі шоу өткізіледі. Көбінесе түрлі шайқастар бейнеленеді. Жауангерлер жазда қайықпен жүзіп қарсыласса, қыста мұз үстінде атпен жүріп шайқасады екен. 


Қолөнер шеберлерінің еңбектерін сол жерде сатып алуға, туындының қалай өмірге келетінін тамашалауға да болады. 


Бұнда кәдесый сататын дүңгіршектер жиі кездеседі. Тамақтанатын орындар да бар. 



Саябақ қызметкерлері, оның ішінде сатушылар ұлттық киім киіп жүреді. 

BAQ.KZ