«Барыс» Мәскеуде «Динамоны» ойсырата жеңді
Астаналық «Барыс» Құрлықтық хоккей лигасының тұрақты чемпионатында мәскеулік «Динамоны» сырт алаңда 4:1 есебімен ұтты.
Бірінші кезеңде есеп ашылған жоқ, ал екінші кезеңде Гарретт Пилон екі шайба соғып, қонақтарды алға шығарды. Алаң иелері Никита Коростелёвтің голымен жауап қайтарды.
Үшінші кезеңде Джейк Масси «Барыстың» басымдығын арттырды. Ойынның соңғы минуттарында Джастин Бэйли шайбаны бос қақпаға бағыттап, қорытынды есепті белгіледі. Осылайша, астаналық клуб Ярославльдегі «Локомотивті» 5:0 есебімен жеңгеннен кейін Мәскеуде де жеңіске жетті.
«Барыс» келесі кездесуін 25 қыркүйекте өз алаңында «Нефтехимикке» қарсы өткізеді.
