БИЗНЕСКЕ ТИІМДІ БАҒЫТ

Бүгінде кәсіпкер үшін өз кәсібін жүргізумен қатар, заң талаптарын дұрыс білу де маңызды. Салықты уақытында төлеу, есептілікті дұрыс тапсыру, электронды қызметтерді пайдалану – мұның бәрі кәсіпкердің күнделікті жұмысының бір бөлігі. Сондықтан салық саласындағы өзгерістерді дер кезінде түсіндіру, кәсіпкерлердің сұрақтарына жауап беру – маңызды міндет.
Осы мақсатта ауданда бизнес өкілдерімен арнайы кездесу өтті. Мемлекеттік кірістер департаментінің басшысы Ғани Мырзағабылұлы ауданға сапары барысында жергілікті кәсіпкерлермен жүздесіп, салық саласындағы өзгерістер жөнінде түсінік берді. Кездесуге аудан әкімінің орынбасары Алмат Алдабергенов те қатысып, кәсіпкерлермен пікір алмасты.

Жиын барысында кәсіпкерлерге салық саласындағы соңғы өзгерістер, жаңа Салық кодексінің жобасында қарастырылған талаптар және салықтық әкімшілендіруді жеңілдету бағыттары түсіндірілді. Кәсіпкер үшін салық заңнамасындағы әрбір өзгерістің маңызы бар. Өйткені оның жұмысы, есеп-қисабы мен қаржылық жоспары салық талаптарымен тікелей байланысты. Сондықтан кездесуде жаңа талаптарды кәсіпкерлерге қарапайым әрі түсінікті түрде жеткізуге басымдық берілді. Кәсіпкер қандай міндетті орындауы керек, салықты қалай дұрыс төлеуге болады, қандай жағдайда жеңілдіктер қарастырылған – осы сияқты мәселелерге назар аударылды.

Осы ретте кәсіпкердің заңды дұрыс білуі – өз кәсібін сенімді жүргізуінің бір кепілі. Талапты алдын ала түсінген адам қателіктің де алдын ала алады.

Жиында Мемлекеттік кірістер органдарының жұмысындағы өзгерістер де кеңінен сөз болды. Кәсіпкерлерге мемлекеттік кірістер органдарының бұрынғы «бақылау мен тексеру» тәсілінен біртіндеп сервистік модельге көшу бағыты түсіндірілді. Мұның мәні қарапайым. Кәсіпкерге тек талап қою емес, сол талаптарды дұрыс орындауға көмектесу. Яғни мемлекеттік орган мен кәсіпкердің арасындағы қарым-қатынаста түсіндіру мен қолдаудың маңызы артып келеді. Әсіресе адал жұмыс істеп, салық міндеттемелерін уақытында орындауға тырысатын кәсіпкерлер үшін қолайлы жағдай қалыптастыру басты бағыттың бірі. Аталған тәсіл кәсіпкердің уақытын үнемдеуге, артық әуре-сарсаңды азайтуға және салықтық міндеттемелерді дұрыс орындауға мүмкіндік береді.

Қазір көптеген мемлекеттік қызмет электронды форматқа көшіп келеді. Салық саласында да цифрлық мүмкіндіктер кеңейіп отыр. Кездесу барысында кәсіпкерлерге «e-Salyq Business» мобильді қосымшасын пайдалану мүмкіндіктері таныстырылды. Сонымен қатар салық есептілігін автоматты түрде толтыру, электронды шот-фактуралармен жұмыс істеу және басқа да цифрлық қызметтер туралы ақпарат берілді. Мұндай мүмкіндіктердің кәсіпкерге берері көп. Біріншіден, уақыт үнемделеді. Екіншіден, қажетті қызметті электронды түрде алуға болады. Үшіншіден, есеп жүргізу мен құжат рәсімдеу жұмыстары жеңілдейді.

Кездесуде мобильді аударымдарға қатысты заңнамалық талаптар да түсіндірілді. Кәсіпкерлерге бұл бағыттағы талаптарды дұрыс түсініп, өз қызметін қолданыстағы заңнамаға сәйкес жүргізудің маңыздылығы айтылды.

Шағын және орта бизнес – аудан экономикасының қозғаушы күштерінің бірі. Себебі шағын кәсіптің өзінде бірнеше адам еңбек етеді. Кәсіпкер кәсібін дамытқан сайын жаңа жұмыс орындары ашылып, халықтың табыс көзі көбейеді.

Осыны ескере отырып, кездесуде шағын және орта бизнес субъектілеріне арналған арнайы салық режимдері мен салықтық жеңілдіктер мәселесіне де көңіл бөлінді. Кәсібін жаңадан бастаған азаматтарға көрсетілетін қолдау түрлері түсіндіріліп, кәсіпкерлік қызметті заң талаптарына сәйкес жүргізудің жолдары айтылды.

Жаңа кәсіп ашу – үлкен жауапкершілік. Ал алғашқы қадамды дұрыс жасау үшін кәсіпкерге ақпарат пен нақты бағыт қажет. Осы тұрғыдан алғанда, мамандардың түсіндіру жұмыстарының маңызы зор.

Кездесудің маңызды бөлігі кәсіпкерлердің өздерін толғандырған мәселелерін тыңдауға арналды. Жергілікті кәсіпкерлер өз сауалдарын қойып, бизнесті жүргізу барысында кездесетін қиындықтарын ашық айтты. Олардың ұсыныстары тыңдалып, көтерілген мәселелер бойынша жауаптар берілді.

Түсінікті заң, қолжетімді қызмет және ашық диалог – кәсіпкерліктің дамуына жол ашатын негізгі тетіктердің бірі. Ал кәсіпкерліктің өркендеуі – жаңа жұмыс орындары мен халықтың әл-ауқатының артуына, сайып келгенде, аудан экономикасының нығаюына ықпал етеді.