Қаңтардың 7-10 күндері аралығында «Бал Текстиль» ЖШС алғаш рет еліміздің атынан Түркияда өткен «CFE 2025 Carpet and Flooring Expo» халықаралық көрмесіне қатысып қайтты. Шымкенттегі «Оңтүстік» арнайы экономикалық аймағында орналасқан кәсіпорын кілем өнімдерін шығарумен айналысады. Халықаралық көрмеде компания тауарларды «Bal Carpet» брендімен таныстырды. Серіктестік басшысы Талғат Ысқақовтың айтуынша, фабрикада 500-ден аса адам тұрақты еңбек етеді. «Бал Текстиль» фабрикасы 2013 жылы жұмысын бастап, қысқа уақыт ішінде отандық кілем өндірісінің көшбасшысына айналып үлгерді. Алғашқы кілемдер сол жылдың қазан айы­нан бастап шығарыла баста­ған. Компания енді аяққа тұр­ған кезеңде фабрикада небәрі төрт-ақ станок жұмыс істеп тұрған. Бүгінде олардың саны 17-ге жетті. Арада екі жыл өткен соң 2015 жылы полипропилен жіптерін өндіретін цех іске қосылды. 2023 жылдың нәтижесі бойынша фабрикада жіп өндірісі екі есе артты. Осы күнде кілем тоқу кәсіпорнының өндірістік қуаты жылына 6 млн шаршы метр кілем мен 7 500 тонна полипропилен жібін құрайды. «Бал Текстиль» кілемдері бельгиялық «Van de Wiele» компаниясының заманауи жабдықтарында тоқылады. Кілем тығыздығы 1 шаршы метр­ге 300 мыңнан 3,6 млн-ға дейінгі түйіндерден тұрады.

Фабриканың өнімдері ТМД елдеріне, сондай-ақ басқа да алыс-жақын шетел­дер­ге экспортталады. Алдағы уақытта компания экспорт­тық әлеуетін арттырып, кілем­дер­ді дүниежүзінің үлкен нарық­тарында сатуды көздеп отыр.

«Бал Текстиль» «CFE 2025 Carpet and Flooring Expo» көрмесіне қатысу арқылы алдына бірқатар мақсат қойды. Атап айтқанда, сатылым аясын кеңейту, әлемдік кілем өндірісі көшбасшыларына отандық кілем­дер­ді таныстыру, әлемдік нарықта қазақ кілемі мен жоғары сапаның рәмізі ретінде «Bal Carpet» брендін қалыптастыру. Осы көрме барысында B2B кездесулер өткізіліп, фабриканың жаңа кілем үлгілері таныстырылды. Одан бөлек, қонақтарға кілемнің «Millenium», «Estate», «The MOD» сияқты премиум санаттағы үлгілері ұсынылды.

Сондай-ақ келушілер «Bomonti», «Graf», «Grant», «Tron», «Viano», «Venus», «Aura», «Eva», «Oscar», «Flora» секілді кілем түр­лерін тамашалауға мүмкіндік алды. «Ыстанбұл қаласында өт­кен ха­лық­­аралық көрмеде біз қазақ кі­ле­мін тоқудан шебер­лік қабі­леті­мізді көрсетіп қана қоймай, оларды шетелге экспорттау бойынша да маңызды қадам­ жасап қайттық. Соның ішін­де Өзбекстан, Беларусь, Әзербайжан елінен келген клиенттермен берік іскерлік байланыс орнаттық. Ресей­лік серіктестермен де келісім­шарт жасасу туралы маңызды мәмілеге қол жеткіздік. Осылардың нәтижесінде компания өніміне халықаралық сұраныс артып, жаңа нарыққа шығуға мүмкіндік ашылады деп сенеміз. Біз шетел нарығында үлкен сұранысқа ие болатын брендтік өнімдерді көбірек шығаруымыз керек. Отандық кілем өнімдері сол мақсатқа жетудің алғашқы қадамдары болады деген үміттеміз», дейді «Бал Текстиль» басшысы Т.Ысқақов. Отандық тоқыма фабрикасы былтыр Астанада өткен Шанхай ынтымақтастық ұйы­мы­ның маңыз­ды жиынын­да жоғары мәртебелі қонақ­тарды қабыл­дайтын орындар мен залдардың барлығына өзі­нің кілемдерін бірегей үлгіде әрі ерекше сәнмен тоқып берді. Ел мәртебесін асыру жолында жасаған осы еңбегі үшін компания мемлекет атынан алғыс пен үлкен құрметке бөленді. 2025 жылы Қытай нарығына жол ашып, сауда-саттық байланысты күшейтуді негізгі жоспар мен мақсат ретінде қарастырып отыр. Сонымен бірге кәсіпорын «Жұ­мыс­шы мамандықтар жылына» орай қарапайым еңбеккер­лерді әлеуметтік тұрғыдан қамта­ма­сыз ету жұмысын күшейте түспек.

 

ШЫМКЕНТ