Есірткі – адам болашағына балта шабатын, өлі арман мен ессіз тағдырдың айқын көрінісі екенін білеміз. Бұл кеселден, ғасыр дертінен тек өзімізді емес, қоршаған ортамызды, өзіміздің жастарымызды және егеменді елімізді арашалап, сақтауға атсалысуымыз қажет. Біз, Сыр елінің жастары, болашағы зор, мәңгілік елде өмір сүргіміз келеді. Нашақорлыққа және есірткі бизнесіне қарсы күрес саясатын толық қолдай отырып, Қазақстанның бүкіл жастарына үндеу жасаймыз! Біз: – азаматтардың салауатты өмір салтын ұстануын; – білімді, дені сау, сауатты болуын; – жоғары кәсібилік пен туған елімізге адал қызмет етуді қолдаймыз! Біз нашақорлық және есірткі бизнесінің кез келген көріністеріне көз жұмып қарай алмайтынымызды осы үндеу арқылы жеткіземіз. Біздің басты міндетіміз – жақсы білім алып, денсаулық деген аманатымызға құрметпен қарап, еліміздің болашағын тек жақсы жаққа қарай бағыттау болуы тиіс. Біздің әрқайсымыз күнделікті өмірде нашақорлық кеселіне қарсы тұра білуіміз керек! Біз Қазақстанның жастарын: – нашақорлық пен есірткіге қарсы өткізілетін ісшараларға қатысуға, – қиындыққа тап болған жерлестерімізді, жастарымызды тығырықтан шығуына көмек беруге; – денсаулығымызға құрметпен қарап, оны мүмкіндігінше сақтауға; – еліміздің дамуына, өсуіне бар күш-жігерімізді салуға шақырамыз! Біз – жарқын елдің болашағымыз! Біздің айтарымыз: «Есірткісіз өмір ғажап!»