Қалижан Жеңісбекұлы Ішкі істер министрлігінің Мақан Есболатов атындағы Алматы академиясының бастығы болып тағайындалды, деп хабарлайды Egemen.kz Polisia.kz сайтына сілтеме жасап. Министрлік мәліметінше, оқу орнының жаңа басшысын жеке құрамға ішкі істер министрінің орынбасары Айдар Сайтбеков таныстырды.  Қобландин Қалижан Жеңісбекұлы 1980 жылы 19 тамызда Қызылорда облысында дүниеге келген.  2001 жылы М.Дулати атындағы Тараз мемлекеттік университетін заңгер мамандығы бойынша, 2006 жылы Ресей Ішкі істер министрлігінің Басқару академиясын мемлекеттік және муниципалдық басқару менеджері мамандығы бойынша тәмамдаған. Қалижан Қобландиннің түрлі басшылық лауазымдарда тәжірибесі бар. Жаңа лауазымға тағайындалғанға дейін ол көліктегі полиция департаменті бастығының орынбасары қызметін атқарған.