Биыл 29 микроқаржы ұйымы мен 14 коллекторлық агенттік жабылған
Фото: Telegram/Aqorda
Мемлекет басшысы Қасым-Жомар Тоқаев Қаржы нарығын реттеу және дамыту агенттігінің төрағасы Мәдина Әбілқасымованы қабылдады, деп хабарлады Ақорда.
Агенттік төрағасы:
- Қаржы нарығындағы жағдай, экономиканың нақты секторына берілетін несие көлемін кеңейтуге және халықтың тым көп несие алуын төмендетуге бағытталған шаралар туралы баяндады;
- Банк акционерлерінің жауапкершілігін қатаңдату үшін төлем қабілеті төмен банктердің жұмысын реттеуге және мемлекеттік қолдауды шектеуге қатысты заң жобасы әзірленіп жатқанын айтты;
- Мемлекет тарапынан көрсетілген қаржылай қолдауды толық өтемейінше, банк басшыларына дивидендтер мен бонустар төлеуге заң жүзінде тыйым салатын өзгеріс енгізу жоспарланып отырғанын жеткізді.
- Жыл басынан бері банктердің активтері 4,8 пайыз, яғни 46,7 трлн теңгеге дейін өскен;
- Экономиканы несиелеу 11,5 пайыз немесе 25,4 трлн теңгеге дейін, соның ішінде шағын және орта бизнеске берілген несиелер 9,0 пайызға немесе 6,6 трлн теңгеге дейін ұлғайған;
- Банктердің капиталына, өтімділігі мен кепіл саясатына, сондай-ақ шетелдік еншілес банктердің несиелік белсенділігін арттыруға қатысты жаңа пруденциалды шаралар әзірленген;
- Шетелдік инвесторлар еліміздің банк секторына кіруі үшін талаптарды оңтайландыру жоспарланып отыр;
- Цифрлық платформалар арқылы стресті активтерді сату, халықтың тым көп несие алуын төмендету, барлық микронесие бойынша бірыңғай мөлшерлеме белгілеу, коллекторлық қызметке қойылатын талаптарды қатаңдату, қаржылық алаяқтыққа қарсы іс-қимыл жөніндегі заң жобаларын әзірлеп, Парламенттің қарауына енгізген;
- Қадағалау қызметі аясында жүргізілген тексерулерден кейін 29 микроқаржы ұйымының және 14 коллекторлық агенттіктің қызметі тоқтатылған. Оларға 90 қадағалау шарасы қолданылып, жалпы сомасы 105,3 млн теңге болатын 338 айыппұл салынған.
