Биыл Қызылорда облысында ауқымды жобалар жүзеге асуда. Мәселен, жол картасының экономиканы дамыту бағыты бойынша жыл басынан бері шағын және орта кәсіпкерлік нысандарын қолдау үшін 198 жобаға қаржылай қолдау көрсетілді. Сондай-ақ, жаңа бизнес-идеяны жүзеге асыруға 722 адамға қайтарымсыз мемлекеттік грант берілді. Бұл туралы облыстық мәслихаттағы «AMANAT» партиясы депутаттық фракциясының жетекшісі Аманжол Оңғарбаев айтты.Көлік инфрақұрылымындамытуда да жаңалық аз емес. Қызылорда қаласы мен аудандардағы елді мекендердің 72,5 шақырым көшесі мен жергілікті маңызы бар 86,7 шақырым жол күрделі және орташа жөндеуден өтуде. Сонымен қатар, білім беру, денсаулық сақтау және спортқа қолжетімділікті арттыру бағытындағы жоспарлы жұмыстар да бақылауда. Жол картасына сәйкес, 2023-2027 жылдар аралығында Сыр өңірінде 26 мектеп салу және 4 мектепке қосымша құрылыс жүргізу жоспарланған.Бұған қоса, үш ауысымда оқытатын білім беру ұйымдары мәселесін шешу үшін облыс орталығындағы 4 мектептің жанынан 1850 орынға лайықталған қосымша ғимарат құрылысы жүргізілуде. Қалған 2 білім нысаны биыл пайдалануға берілетін Жезқазған трассасы бойындағы 600 орындық жаңа мектеп есебінен шешіледі. Осылайша биыл үш ауысымда оқыту мәселесі шешіледі деп күтілуде.Бұдан бөлек, аудандардағы орын тапшылығын шешу үшін жыл соңына дейін жаңа 3 мектеп  пайдалануға берілмек. Орайы келгенде айта кетейік, 2023-2027 жылдары 14 спорт нысанын салу жоспарланған. Оның ішінде биыл республикалық және облыстық бюджет есебінен қала мен 7 ауданда 12 нысан құрылысы және «Самұрық-Қазына» ұлттық әл-ауқат қоры» АҚ демеушілігі есебінен Қызылорда қаласы Махамбет ауылында спорт кешенінің құрылысы жүруде. Жалпы бұлардың ішінен 2 спорт нысаны ел игілігіне берілсе, 9 спорт нысанын жыл соңында пайдалануға беру жоспарда тұр. Қалған 2 нысан құрылысы 2024 жылға өтпелі.Айтпақшы, денсаулық сақтау саласы бойынша 27 нысан құрылысын жүргізу  жоспарланған. Оның 16-сы биыл, қалған 11-і келер жылы іске асырылмақ.