«Бала ойынмен өседі» демекші, ойындардың бала тәрбиесіндегі рөлі ерекше. Ол – сандаған ұрпақтың керегіне жарап, оларды өмірге әзірлеу қажетін өтеген, сыннан өткен сенімді тәрбие құралы. Ойын жігерлікке, шыдамдылыққа және ұйымшылдыққа тәрбиелейді. Сондай-ақ балалардың ойлау қабілетін дамытады. Президент Қасым-Жомарт Кемелұлы биылғы жылды «Балалар жылы» деп жариялағаны белгілі. Осы бағытта 13 желтоқсан күні Авангард «ПГС» жауапкершілігі шектеулі серіктестігінің демеушілігімен Жаңатұрмыс ауылында ойын алаңының ашылу салтанаты өтті.
Шараға аудан әкімінің орынбасары А.Жандарбеков пен аудандық әйелдер кеңесінің төрайымы Н.Палымбет, сондай-ақ ауыл ардагерлері қатысты. Спортты жанына серік еткен жастарды дамытып, алдағы уақытта болашақ чемпиондарды шығарып, көк байрағымызды көкте желбірету мақсатында ашылған ойын алаңы ауыл тұрғындарын қуанышқа бөледі.

Алаңның ішінде балаларға арналған әткеншектер салынып, сырғанақ, өрмелеуіш, төбесі жабылған ойын құрылғылары орнатылған. Сонымен қатар түрлі-түсті сырлармен әсемделіп, безендірілген балалар алаңына құм төгілген.