Қызылорда облысының бас мешіті – «Ақмешіт-Сырдария» орталық мешітінде Сыр имамдарының алқалы жиыны өтті.
Аймақтың бас имамы Болатбек Абуовтың төрағалығымен өткен қорытынды жиында өңір мешіттерінің ҚМДБ бекіткен 4 бағыт бойынша бір жылда атқарған жұмыстарына шолу жасалып, нәтижелері бағаланды.

Жиында Болатбек Ұласқанұлы пандемия уақытына қарамастан, асыл дініміздің насихатталуы мен ел игілігі үшін аянбай еңбек еткен дін қызметкерлеріне ризашылығын білдіре отырып, өкілдік тарапынан дайындалған «Үздік ауыл имамы»,­ «Үздік ағартушы имам», «Үздік қаламгер имам», «Үздік насихатшы имам», «Үздік блогер», «Үздік үйлестіруші имам», «Үздік іскер имам», «Үздік ерікті имам», «Үздік әуезді қари», «Үздік әуезді азаншы», «Үздік белсенді имам» номинация­­ларын, облыс және қала әкімдерінің алғыс хаттарын табыстады.

Сыр имамдарының жылды қорытындылау ­жиынында «Үздік іскер имам» дәрежесіне лайық деп танылған Шиелі ауданының бас имамы Бақыт Ұлжаев игі жобалардың ұйытқысы бола білгені үшін ерекше құрметке бөленді. Б.Ұлжаев Шиелі ауданының қоғамдық-саяси ахуалының, оның ішінде діни ахуалының тұрақтылығына, сондай-ақ, жыл басынан бері өте көп қайырымдылық іс-шаралардың жүзеге асуына мұрындық болып келеді. Иә, аудандағы исі мұсылман жамағатына адал қызмет етіп, Алланың хақ дініне қызмет етіп келе жатқан жерлесімізді жаңа жетістігімен біз де құттықтаймыз.