Жуырда аудандық оқушылар үйі «Салтанат» сарайында ішкі сая­сат бөлімінің «Жастар ресурстық орталығы» коммуналдық мемлекеттік мекемесі және «Ашық Азаматтық Қоғам» ақпараттық-ресурстық орталығының «Жастарға патриоттық тәрбие беру және жас­тар арасында салауатты өмір салтын қалыптастыру» әлеуметтік жобасы аясында жас суретшілер байқауы өтті.
1 желтоқсан – ҚР Тұңғыш Президент күніне орай мектеп оқушылары арасында карантин талаптарын сақтай отырып, маскалық режиммен өткен сурет байқауында 16 үміткер бақ сынады. Байқаудың мақсаты – жастардың шығармашылық қырларын ашып, дарынды жас­тарды анықтау және қолдау. Сонымен қатар танымдық қызығушылықтарға ынталандыру. Олардың туындыларын көпшілікке жария ету арқылы жас суретшілердің белсенділігін арттыруға бағытталды.

Қиялына қанат бітіріп, қылқаламын қолына ұстаған жас суретшілердің өнерін бағалаған қазылар «Ғажайып сурет» номинациясы бойынша 2 қатысушыны, «Сиқырлы қалам» номинациясымен 2 суретшіні марапаттады. Сондай-ақ шығармашылық ерекшелігімен дараланған 2 суретші «Шығармашыл жас» номинациясын иеленді. Байқау қорытындысын жариялап, барлық қатысушының өнерін бағалау мақсатында Алғыс хат берілді. Кеш соңын қорытындылаған Ынтымақ Боранбайұлы жас қылқалам шеберлерін жетістігімен құттықтады.