Өскен өңір Osken-onir.kz ақпараттық агенттігі
» » Израиль ғалымдары коронавирусты 30 секундта анықтайтын жаңа әдіс ойлап тапты

Израиль ғалымдары коронавирусты 30 секундта анықтайтын жаңа әдіс ойлап тапты

Дүниежүзіне жаппай таралып жатқан коронавирусқа қарсы вакцина ойластырып, індетті жылдам анықтайтын экспресс-тестер шығарып жатқанын қазір көптеген елдер жарыса айтуда. Күні кеше Израиль ғалымдары адам бойындағы вирус жұқпасын жарты минутта анықтайтын бағдарлама ойлап тапқанын қуана жариялады.
Жасанды интеллектуалдық жобалармен айналысатын RADLogics компаниясы өздері ойлап тапқан бағдарлама COVID-19 вирусын компьютерлік томография сараптамалары негізінде  анықтайтынын айтады. «Анализ нәтижесінің дәлдігі өте жоғары деп сеніммен айта аламыз. Автоматтандырылған жүйе ауруды бастапқы сатысында анықтап қана қоймай, оның әрі қарай қалай өршитінін,  емделуші үшін қаншалықты ауыр болатынын да болжай алады» дейді мамандар. Жаңа жобаны сүзгіден өткізу үшін Қытай мен Америкадағы 157 пациенттің сырқат тарихы бағдарламаға енгізіліп, жүйе бәрінің диагнозын 98,2 пайыз дәлдікпен дұрыс анықтаған.
Жаңа интеллектуалдық компьютерлік жүйені әрі қарай дамыту жұмыстары жалғаса береді. Бірақ қазірдің өзінде оны коронавирусты алғашқы кезеңде анықтау үшін пайдалануға болатын көрінеді.
 
Қымбат НҰРҒАЛИ

Egemen Qazaqstan


22 наурыз 2020 ж. 411 0