BAQ.KZ. Мемлекет басшысы «Ұлттық нейрохирургия орталығы» акционерлік қоғамы басқармасының төрағасы Серік Ақшолақовты қабылдады. Бұл туралы Ақорданың баспасөз қызметі.

Кездесу барысында Қазақстан Президентіне Орталықтың соңғы 10 жылда атқарған жұмыстарының нәтижелері мен оны дамытудың келешегі жөнінде баяндалды.

Атап айтқанда, Серік Ақшолақов Қасым-Жомарт Тоқаевқа Орталықта микронейрохирургия, эндоваскулярлық, эндоскопиялық, функционалды нейрохирургия сияқты жаңа бағыттардың пайда болғаны туралы айтты.

Сонымен қатар ол мекеме базасында аса күрделі нейрохирургиялық оталар жасауға мүмкіндік беретін Орталық Азияда алғашқы «гамма-нож» кешенінің іске қосылатыны жөнінде хабарлады.

Мемлекет басшысы еліміздің барлық өңірін қамтуға тиіс жоғары білікті әрі қолжетімді медициналық көмек көрсетудің маңызды екенін атап өтті.