2019-2020 оқу жылында облыс бойынша 1 сыныпқа 21 600 оқушы барады деп жоспарлануда. Бұл өткен жылмен салыстырғанда 2200 оқушыға артық. Жалпы жаңа оқу жылында аймақтағы 293 мектепте 164 500 оқушы білім алатын болады. Ал аудан бойынша биылғы жылы 2256 бала мектеп табалдырығын аттамақ. Өткен оқу жылында 1 сыныпқа қабылданған бүлдіршіндердің саны 2074 болған.
–Биылғы жылдың 1 маусымынан бастап 1 сыныпқа қабылдау процесі автоматтандырылған жүйеге қосылды. Қазіргі таңда 1 сыныпқа қабылданатын балалардың мөлтек аудандар бойынша мектептерге орналастыру картасы дайын»,– дейді облыстық білім басқармасының басшысы Майра Мелдебекова облыс әкімдігінің аппарат мәжілісінде.
«Ауыл ел бесігі» бағдарламасы бойынша Қармақшы, Жалағаш аудандарындағы 3 мектепке республикалық бюджет есебінен күрделі жөндеу жұмыстары жүргізілуде. Сонымен қатар, аудандық бюджет есебінен Қазалы ауданындағы №238 және Шиелі ауданындағы №155 мектеп күрделі жөндеуден өтуде. Ал бұдан өзге 300-ге жуық білім ордасына ағымдағы жөндеу жұмыстары жасалып жатыр.

А.ДҮЙСЕБАЙ